Një korridor i ri digjital që lidh Shqipërinë me Greqinë dhe më tej me rrjetet europiane dhe ato ndërkombëtare është në fazë diskutimi, pas nënshkrimit të një memorandumi mirëkuptimi mes kompanisë 4iG International Digital Infrastructure Zrt. dhe Grid Telecom.
Marrëveshja synon të eksplorojë bashkëpunimin strategjik në fushën e telekomunikacionit me shumicë dhe ndërtimin e infrastrukturës digjitale ndërkufitare, duke shfrytëzuar kapacitetet plotësuese të dy kompanive.
4iG IDI, një njësi e grupit 4iG e fokusuar në projekte ndërkombëtare të infrastrukturës digjitale, dhe Grid Telecom, një kompani në pronësi të plotë të operatorit grek të transmetimit të energjisë IPTO, synojnë të shkëmbejnë ekspertizë dhe të zhvillojnë së bashku projekte të reja që rrisin lidhjen mes Shqipërisë, Greqisë dhe rajonit më gjerë.
Në qendër të këtij bashkëpunimi është ndërtimi i një linje tokësore me fibra optike me kapacitet të lartë mes Shqipërisë dhe Greqisë.
Ky projekt synon krijimin e një korridori të qëndrueshëm digjital që lidh rrjetet e të dy kompanive dhe përmirëson ndjeshëm lidhjen ndërkufitare dhe ndërkombëtare, nga Mesdheu drejt pikave kryesore të lidhjes në Europë.
Paralelisht, marrëveshja hap rrugën edhe për bashkëpunim me partnerë të tjerë strategjikë për zhvillimin e një sistemi të ri kabllor nënujore me fibra optike në detin Adriatik dhe Mesdhe. Ky projekt do të përfshijë projektimin, ndërtimin, operimin dhe komercializimin e një infrastrukture të re me kapacitet të lartë transmetimi.
Drejtuesi ekzekutiv i Grid Telecom, Kostas Agathakis, theksoi se bashkëpunimi do të mbështesë krijimin e një korridori të ri digjital që shtrihet nga Lindja e Mesme drejt Europës, duke rritur rolin e Greqisë si nyje strategjike lidhjeje në Mesdheun Lindor dhe Ballkan.
Nga ana tjetër, zv.drejtori i 4iG për infrastrukturën digjitale ndërkombëtare, László Blénessy, u shpreh se marrëveshja përfaqëson një hap të rëndësishëm për forcimin e lidhjes digjitale në rajon dhe për ndërtimin e rrjeteve të qëndrueshme me kapacitet të lartë që mbështesin biznesin dhe rritjen ekonomike.
Ky zhvillim pritet të rrisë rëndësinë strategjike të Shqipërisë në hartën e infrastrukturës digjitale rajonale, duke e pozicionuar si një pikë lidhjeje mes rrjeteve të Mesdheut dhe atyre europiane.
