Duket si diçka e zakonshme dhe pa rëndësi, por Barcodi që gjendet në çdo produkt është një nga shpikjet më të rëndësishme në historinë e tregtisë. Pa të, mënyra si blejmë, shesim dhe shpërndajmë mallrat do të ishte shumë më e ngadaltë dhe më e kushtueshme.
Ideja për Barcode lindi në vitin 1948, kur një menaxher supermarketi kërkoi një mënyrë për të regjistruar automatikisht produktet në arkë, pa qenë nevoja që punonjësit të mbanin mend çmimet. Kjo ide u zhvillua nga studenti Norman Woodland dhe shoku i tij Bernard Silver, të cilët menduan të përdorin vija me trashësi të ndryshme për të përfaqësuar informacionin e produkteve.
Megjithëse patenta u regjistrua në vitin 1952, teknologjia e kohës nuk ishte gati për ta përdorur. Vetëm në vitet 1970, me zhvillimin e kompjuterëve dhe lazerëve, kodi me vija filloi të përdorej realisht. Produkti i parë që u skanua ishte një paketë çamçakëzi në një supermarket në SHBA, në vitin 1974.
Nga ai moment, gjithçka ndryshoi. Pagesat në kasa u bënë më të shpejta, gabimet u reduktuan dhe procesi i blerjes u thjeshtua ndjeshëm.
Por ndikimi më i madh ishte te bizneset.
Për herë të parë, kompanitë mund të dinin në kohë reale se cilat produkte po shiteshin dhe cilat jo. Kjo ndihmoi në organizimin më të mirë të magazinave, uljen e stokut të panevojshëm dhe rritjen e efikasitetit.
Kodi me vija bëri të mundur edhe ndjekjen e produkteve në çdo hap, nga fabrika deri te konsumatori. Kjo uli kostot, reduktoi humbjet dhe krijoi bazën për tregtinë globale siç e njohim sot.
Sot, teknologjia ka evoluar me kode QR dhe sisteme të tjera më të avancuara, por ideja bazë mbetet e njëjtë: çdo produkt ka një identitet unik që mund të lexohet nga makinat.
Edhe pse përdoret çdo ditë, Barcode mbetet një nga revolucionet më të padukshme. Pa të, tregtia moderne, logjistika dhe madje edhe blerjet online do të ishin shumë më të vështira dhe më të ngadalta. /skyweb.al
