Stresi i përditshëm në vendin e punës po kthehet në një nga arsyet kryesore pse shumë njerëz vuajnë nga dhimbjet e kokës dhe migrena.
Email-et që presin përgjigje, takimet që afrohen, telefonatat e shumta dhe presioni për të përfunduar detyrat në kohë kanë krijuar një rutinë të lodhshme për shumë punonjës. Ky presion i vazhdueshëm mban trupin në tension dhe shpesh shfaqet në formën e dhimbjeve të kokës.
Sipas American Psychological Association, stresi nuk është gjithmonë i keq. Në disa raste, ai mund të ndihmojë në përqendrim dhe performancë më të mirë.
Por kur bëhet i vazhdueshëm, ai dëmton shëndetin dhe mund të përkeqësojë probleme si migrena.
Kur një person është nën stres për një kohë të gjatë, trupi prodhon vazhdimisht hormone si kortizoli dhe adrenalina. Kjo e mban organizmin në një gjendje alarmi, duke rritur rrahjet e zemrës dhe tensionin nervor.
Në këto kushte, rritet mundësia për dhimbje koke dhe migrenë.
Situata përkeqësohet edhe më shumë nga mungesa e gjumit. Personat e stresuar shpesh nuk flenë mirë, dhe kjo krijon një cikël ku lodhja dhe dhimbja e kokës përforcojnë njëra-tjetrën.
Ekspertët theksojnë disa nga arsyet kryesore që rrisin stresin në punë:
- ngarkesë e madhe pune
- paga të ulëta
- mungesë mbështetjeje
- pritshmëri të paqarta
- mungesë mundësish për zhvillim
Për të ulur stresin dhe për të shmangur dhimbjet e kokës, rekomandohen disa hapa të thjeshtë.
Pushimet e shkurtra gjatë ditës ndihmojnë shumë. Edhe 10 minuta për të marrë frymë thellë dhe për t’u qetësuar mund të ulin tensionin. Aktiviteti fizik, si ecja apo ushtrimet e lehta, ndihmon trupin të relaksohet dhe të ulë stresin.
Po ashtu, qëndrimi korrekt gjatë punës dhe shmangia e qëndrimit të gjatë në një pozicion ndihmojnë në parandalimin e dhimbjeve të kokës. Teknikat e frymëmarrjes dhe meditimi janë gjithashtu të dobishme për të qetësuar mendjen.
Ekspertët këshillojnë edhe vendosjen e kufijve të qartë mes punës dhe kohës personale, si dhe shmangien e komunikimeve jashtë orarit të punës.
Nëse dhimbjet e kokës vazhdojnë, rekomandohet konsultimi me mjekun për të gjetur shkakun dhe trajtimin e duhur.
Sipas American Psychological Association, menaxhimi i stresit është thelbësor për të ruajtur shëndetin, sidomos në një kohë kur ritmi i punës po bëhet gjithnjë e më intensiv.
