Kryeministri Edi Rama ka paralajmëruar ndryshim të qartë të qasjes për zgjedhjet vendore të vitit 2027, duke vendosur kritere konkrete për kryebashkiakët që synojnë rikandidimin.
Gjatë fjalës në Asamblenë e Partisë Socialiste, Rama deklaroi se asnjë kryetar bashkie nuk do të rikandidojë nëse nuk ka realizuar të paktën 10 kontrata në kuadër të “Paketës së Maleve” dhe nuk ka krijuar të paktën 3 ndërmarrje me pronësi të përbashkët.
Kryeministri theksoi se zgjedhjet vendore janë një mundësi për t’i dhënë më shumë rol diasporës përmes rezultateve konkrete dhe jo vetëm përmes aktiviteteve simbolike.
Deklarata sinjalizon një orientim të ri të pushtetit vendor drejt bashkëpunimit me sektorin privat, përmes modeleve të ortakërisë në menaxhimin dhe zhvillimin e aseteve publike.
Ky model ngjan me skemën e aplikuar në nivel qendror në raste si kompania KAYO, ku shteti dhe privatët janë bashkëaksionerë në projekte të caktuara strategjike.
Në këtë mënyrë, qeveria duket se synon të shtrijë logjikën e partneriteteve publik-privat edhe në nivel bashkish, duke e kthyer atë në kusht politik për vazhdimin e mandateve lokale.
Qëndrimi i Ramës pritet të hapë debat mbi mënyrën e përdorimit të aseteve publike dhe rolin e sektorit privat në zhvillimin vendor. /skyweb.al
