Shqipëria ende nuk plotëson kushtet e BE-së për administrimin e fondeve IPARD III, të cilat synojnë të mbështesin bujqësinë dhe zhvillimin rural. Komisioni Europian kërkon forcimin e mekanizmave të kontrollit financiar dhe rritjen e kapaciteteve institucionale përpara se vendit t’i besohet menaxhimi i këtyre financimeve.
Në Raportin e Progresit për vitin 2026, Komisioni Europian evidenton se Shqipëria ka bërë hapa përpara në krijimin e strukturave për administrimin e mbështetjes bujqësore, por ende përballet me mangësi në kapacitetet teknike dhe njerëzore.
Sipas raportit, autoritetet shqiptare kanë paraqitur dy kërkesa për marrjen e përgjegjësisë së menaxhimit të fondeve IPARD III, më 1 prill dhe 18 qershor 2026. Megjithatë, Komisioni thekson se vendi duhet të përmbushë të gjitha kushtet paraprake përpara se të marrë përsipër administrimin e programit, duke respektuar parimet e menaxhimit të shëndoshë financiar.
Në fokus të kërkesave të Brukselit është garantimi i transparencës dhe kontrollit mbi përdorimin e parave europiane, në mënyrë që financimet të shpërndahen sipas kritereve të përcaktuara dhe të shkojnë për projektet dhe qëllimet për të cilat janë miratuar.
Një tjetër sfidë e evidentuar është ngritja dhe funksionalizimi i Sistemit të Integruar të Administrimit dhe Kontrollit (IACS). Ky mekanizëm konsiderohet thelbësor për identifikimin e fermerëve përfitues, verifikimin e të dhënave dhe kontrollin e pagesave të mbështetjes financiare në sektorin bujqësor.
Përmbushja e këtyre kërkesave është një kusht i rëndësishëm që Shqipëria të mund të marrë përgjegjësinë për administrimin e fondeve IPARD III dhe të garantojë zbatimin e tyre sipas standardeve të Bashkimit Europian.
