Banka e Shqipërisë ka vlerësuar se mjedisi financiar në vend vijon të mbetet i qëndrueshëm dhe likuid, me kosto të ulëta financimi dhe ritme të larta të kreditimit.
Në raportin e fundit për Politikën Monetare, institucioni thekson se efektet e lehtësimit monetar janë ndierë dukshëm në treg, duke sjellë ulje të normave të interesit dhe stabilizim të kursit të këmbimit, pas një periudhe të gjatë mbiçmimi të lekut.
Sipas të dhënave zyrtare, kredia për sektorin privat ka shënuar rritje të ndjeshme gjatë tremujorit të tretë, me 13.9%krahasuar me të njëjtën periudhë të një viti më parë, pas zgjerimit prej 16% në gjashtëmujorin e parë. Kjo rritje është mbështetur si nga kushtet e favorshme të financimit, ashtu edhe nga rritja e kërkesës për kredi nga individët dhe bizneset.
Sipas Bankës, dinamika më e fortë e kreditimit vërehet tek familjet dhe kreditë në monedhën Lekë, ndërsa ritmi i huadhënies për bizneset është ngadalësuar disi. Megjithatë, kredia për investime ruan një nivel të lartë rritjeje, duke treguar se kompanitë po vijojnë të investojnë në rritjen e kapaciteteve prodhuese dhe modernizimin e aktivitetit të tyre.
“Perspektiva për kreditim mbetet pozitive”, thekson Banka e Shqipërisë, duke shtuar se treguesit financiarë tregojnë shëndet të mirë të sektorit bankar, i cili karakterizohet nga likuiditet i bollshëm dhe nivel shumë i ulët i kredive me probleme.
Sipas raportit, ndërhyrjet e Bankës në tregun valutor dhe stabiliteti në sektorin e jashtëm të ekonomisë kanë ndihmuar në zbutjen e presioneve mbi kursin e këmbimit, duke ruajtur balancën e tregjeve financiare dhe mbështetur klimën e përgjithshme të besimit në ekonomi. ./skyweb.al
