Popullsia e Shqipërisë vijon të ndjekë një trend të pandalshëm tkurrjeje, e ndikuar si nga rënia e numrit të lindjeve, ashtu edhe nga emigracioni. Gjatë vitit 2025, migracioni neto rezultoi negativ me rreth 28.5 mijë persona, pasi numri i atyre që u larguan nga vendi tejkaloi ndjeshëm numrin e të kthyerve.
Sipas të dhënave të INSTAT, më 1 janar 2026 popullsia e Shqipërisë arriti në 2.335.930 banorë, duke shënuar një rënie prej 1,16% krahasuar me 1 janarin 2025.
Kjo rënie është rezultat i dy faktorëve kryesorë demografikë. Nga njëra anë, shtesa natyrore e popullsisë mbeti pozitive, me 1.147 lindje më shumë se vdekje gjatë vitit 2025. Nga ana tjetër, migracioni neto vazhdoi të ishte negativ, me 28.531 persona më shumë që u larguan sesa u kthyen në vend.
Raporti gjinor në lindje mbeti pothuajse i pandryshuar krahasuar me vitin paraardhës, me 107,9 djem të lindur për çdo 100 vajza.
Përllogaritjet e popullsisë tregojnë se vetëm qarku i Tiranës regjistroi rritje të numrit të banorëve gjatë vitit 2025, me 0,7% më shumë krahasuar me një vit më parë.
Ndërkohë, tkurrja më e madhe e popullsisë u regjistrua në qarqet e Kukës (-2,59%) dhe Shkodër (-2,56%).
Qarqet me peshën më të madhe në popullsinë totale të vendit mbeten Tiranë, Fier, Elbasan dhe Durrës. Në fillim të vitit 2026, Tirana përfaqësonte rreth 32,8% të popullsisë së vendit, duke ruajtur pozicionin si qarku më i populluar. Pas saj renditen Fieri me 9,7%, Elbasani me 9,5% dhe Durrësi me 9,4% të popullsisë kombëtare.
Të dhënat e INSTAT nxjerrin në pah edhe vazhdimin e procesit të plakjes së popullsisë. Mosha mediane, e cila e ndan popullsinë në dy pjesë të barabarta, arriti në 45 vjeç në fillim të vitit 2026, nga 44,3 vjeç një vit më parë, duke iu afruar gjithnjë e më shumë mesatares së vendeve europiane. /skyweb.al
