Grupi Lufthansa po ndryshon strukturën e tarifave për fluturimet e shkurtra dhe të mesme, duke futur një kategori të re më ekonomike që pritet të ndikojë drejtpërdrejt në mënyrën si udhëtarët paguajnë për shërbimet bazë.
Nga 28 prilli, për fluturime që nisin nga 19 maji, do të aplikohet tarifa “Economy Basic”, e cila nuk përfshin më bagazhin e kabinës në çmimin fillestar.
Sipas modelit të ri, pasagjerët do të kenë të përfshirë vetëm një send personal të vogël që vendoset nën sedilje, ndërsa bagazhi standard i kabinës do të ofrohet si shërbim shtesë me pagesë.
Ndryshimi prek një pjesë të madhe të grupit, përfshirë Lufthansa, Swiss, Austrian Airlines, Brussels Airlines, Discover Airlines, Lufthansa City dhe Air Dolomiti, ndërsa për momentin mbetet jashtë ITA Airways.
Kompania sqaron se tarifa e re nuk zëvendëson ofertën ekzistuese, por shton një nivel të ri më të ulët, duke e çuar numrin e tarifave Economy nga tre në katër.
“Basic” pozicionohet nën “Light”, ndërsa kjo e fundit pritet të përfitojë funksionalitete shtesë, si mundësia për ndryshim rezervimi me pagesë.
Në thelb, nuk bëhet fjalë për ulje reale çmimesh, por për një ristrukturim të ofertës me qëllim rritjen e të ardhurave për pasagjer.
Ekspertët e tregut parashikojnë tre skenarë: ose tarifa e re do të ulë çmimin fillestar në kërkimet online, ose do të mbajë të njëjtin nivel me “Light” aktuale duke rritur koston për shërbimet shtesë, ose skenari më i mundshëm, ku çmimi bazë duket më i ulët, por në total udhëtimi përfundon njësoj ose më i shtrenjtë pasi shtohen opsionet me pagesë.
Ky model, i njohur në linjat low-cost, synon të ndajë qartë çmimin e parë që sheh klienti nga shuma përfundimtare që paguan në fund të procesit të rezervimit.
Në praktikë, udhëtari përballet me një çmim më të ulët në fillim, por me një faturë më të lartë në përfundim, në varësi të shërbimeve që zgjedh të shtojë./skyweb.al
