Vajzat e vaksinuara kundër HPV-së (virusi i papillomës njerëzore) në moshën 12–13 vjeç kanë pothuajse zero rrezik të vdesin nga kanceri i qafës së mitrës para moshës 30-vjeçare, sipas një studimi të ri historik.
Studimi i parë i këtij lloji tregon se numri i vdekjeve ka rënë ndjeshëm që kur vaksina filloi t’u ofrohej vajzave të moshës shkollore në vitin 2008, dhe deri tani rreth 200 jetë janë shpëtuar në Angli falë kësaj vaksine, raporton BBC.
Midis viteve 2020 dhe 2024, nuk u regjistrua asnjë vdekje nga kanceri i qafës së mitrës te gratë e moshës 20–24 vjeç, hera e parë që kjo ka ndodhur gjatë një periudhe pesëvjeçare.
Pa vaksinimin, do të priteshin rreth 23 vdekje. “Është e jashtëzakonshme të mendosh se një injeksion i vetëm mund të eliminojë pothuajse plotësisht një lloj të caktuar kanceri,” tha Peter Sasieni, studiuesi kryesor në Queen Mary University of London.
Në përgjithësi, kanceri i qafës së mitrës mbetet ende kanceri i 14-të më i zakonshëm te femrat në Mbretërinë e Bashkuar, me rreth 3,300 raste të reja të diagnostikuara çdo vit.
Mendohet se HPV-ja, një virus që përhapet përmes kontaktit të ngushtë lëkurë më lëkurë, shkakton 99% të këtyre rasteve. Shumica e infeksioneve me HPV zhduken vetvetiu pa shkaktuar probleme, por disa prej tyre shkaktojnë ndryshime jonormale në qeliza dhe mund të çojnë në zhvillimin e kancerit vite më vonë.
Autorët e raportit presin që numri i vdekjeve nga kjo sëmundje të vazhdojë të bjerë, pasi gjithnjë e më shumë persona po vaksinohen kundër HPV-së dhe brezat e vaksinuar po rriten në moshë. /skyweb.al
