Air India ka shkarkuar menjëherë komandantin e fluturimit AI2379, pasi ai rezultoi pozitiv ndaj një substance psikoaktive në testin konfirmues të kryer pas uljes.
Autoriteti indian i hetimit të aksidenteve ajrore, AAIB, nuk ka bërë të ditur llojin e substancës dhe nuk ka vendosur ndonjë lidhje mes rezultatit të testit dhe incidentit gjatë fluturimit.
Ngjarja ndodhi më 4 gusht, kur Airbus A320neo me regjistrim VT-EXO po udhëtonte nga Phuket drejt Delhit me 145 persona në bord.
Avioni ndodhej në lartësinë rreth 13 000 metra kur sistemi sinjalizoi humbjen e presionit në qarkun hidraulik të gjelbër. Vetëm katër sekonda më vonë, dolën jashtë funksionit edhe qarqet blu dhe të verdhë.
Autopiloti u çaktivizua, në kabinë u ndez alarmi i vazhdueshëm dhe pak më vonë u aktivizua për dy sekonda edhe paralajmërimi për humbjen aerodinamike të avionit.
View this post on Instagram
Sipas analizës së parë të Airbus, për rreth katër sekonda pilotët nuk morën përgjigje nga timonët e thellësisë dhe aileronët, sipërfaqet kryesore që kontrollojnë lëvizjen e avionit.
Gjatë incidentit, avioni u ngjit 372 këmbë mbi lartësinë e përcaktuar dhe më pas zbriti 292 këmbë poshtë saj. Qarku hidraulik blu u rikthye nëntë sekonda pas alarmit të parë, ndërsa qarqet e tjera u rivendosën pak më vonë.
Tre sistemet hidraulike të A320 janë të pavarura dhe të projektuara për të garantuar funksionimin edhe në rast defekti. Humbja pothuajse e njëkohshme e të tre sistemeve konsiderohet një ngjarje jashtëzakonisht serioze.
Avioni ishte nisur me njësinë e transferimit të energjisë, PTU, jashtë funksionit, por brenda kushteve të lejuara nga lista minimale e pajisjeve. Raporti paraprak nuk e përcakton këtë defekt si shkakun e incidentit.
Me sinjalin e rripave të sigurimit të fikur, gjatë lëvizjeve të forta të avionit u plagosën 20 pasagjerë dhe katër anëtarë të ekuipazhit. Katër prej tyre pësuan dëmtime të rënda.
Brenda avionit u dëmtuan panelet, ndarjet e bagazheve dhe sediljet e ekuipazhit, ndërsa një prej tualeteve u shkëput nga vendi.
Hetimi duhet të përcaktojë përse të tre sistemet hidraulike u çaktivizuan brenda pak sekondash dhe më pas u rikthyen në funksion. Raporti tregon se incidenti ishte dukshëm më serioz sesa “turbulenca” e përmendur në komunikimet e para.
