Pas operacionit të zhvilluar në Tiranë disa ditë më parë, Europol ka publikuar detaje të reja mbi mënyrën se si funksiononte rrjeti kriminal i call center-ave, duke hedhur dritë mbi përmasat dhe organizimin e skemës së mashtrimit.
Sipas agjencisë europiane të policisë, rrjeti që operonte nga Shqipëria kishte një strukturë të mirëorganizuar, të ngjashme me një kompani të mirëfilltë, me ndarje të qartë rolesh, menaxhim hierarkik dhe departamente të dedikuara për shitje, IT, financë dhe burime njerëzore .
Europol konfirmon se përmes këtyre strukturave janë mashtruar mijëra qytetarë në disa vende të Europës dhe më gjerë, me një dëm total që arrin të paktën 50 milionë euro. Viktimat joshnin përmes platformave të rreme investimi, ndërsa më pas kontaktoheshin nga “agjentë” që paraqiteshin si këshilltarë financiarë.
Një nga elementët kyç të skemës ishte përdorimi i gjuhëve të ndryshme, si gjermanisht, anglisht, italisht, greqisht dhe spanjisht, për të ndërtuar besim me viktimat dhe për të rritur efektivitetin e mashtrimit. Operatorët punonin në ekipe prej 6 deri në 8 personash, të specializuar sipas tregjeve që synonin.
Sipas të dhënave, rrjeti kishte deri në 450 persona të përfshirë në aktivitete të ndryshme, ndërsa operatorët paguheshin me një pagë bazë rreth 800 euro dhe komisione për çdo kontratë të realizuar.
Europol zbulon gjithashtu se mashtrimi nuk ndalej me fazën fillestare. Viktimat kontaktoheshin sërish me oferta për rikuperimin e parave të humbura, duke u kërkuar të kryenin pagesa të reja, shpesh përmes platformave të kriptomonedhave.
Operacioni që çoi në arrestimin e 10 personave dhe sekuestrimin e rreth 900 mijë eurove në Tiranë u zhvillua më 17 prill 2026, pas një hetimi të përbashkët mes autoriteteve shqiptare dhe austriake, të koordinuar nga Europol dhe Eurojust.
Publikimi i këtyre detajeve nga Europol konsiderohet i rëndësishëm, pasi jep një panoramë të plotë të mënyrës se si funksionojnë rrjetet e mashtrimit online në Shqipëri dhe shtrirjen e tyre ndërkombëtare, përtej informacionit të bërë publik gjatë operacionit policor. /skyweb.al
