Kompania ajrore Ryanair ka njoftuar mbylljen e bazës së saj në Berlin, duke nisur nga 24 tetori, një vendim që do të sjellë reduktimin me 50% të fluturimeve nga kryeqyteti gjerman.
Vendimi lidhet drejtpërdrejt me rritjen e kostove operacionale në Gjermani, veçanërisht taksat aeroportuale, të cilat pritet të rriten me rreth 10% në periudhën 2027–2029. Sipas kompanisë, niveli aktual i tarifave konsiderohet tashmë shumë i lartë dhe jo konkurrues në raport me tregjet e tjera europiane.
Si pjesë e këtij ristrukturimi, Ryanair do të tërheqë 7 avionë nga aeroporti Berlin-Brandenburg, duke i zhvendosur në vende të tjera europiane me kushte më të favorshme operimi. Kjo lëvizje pritet të ketë ndikim të drejtpërdrejtë në trafikun e pasagjerëve, i cili parashikohet të bjerë nga rreth 4.5 milionë në 2.2 milionë pasagjerë në vit deri në vitin 2027.
Të dhënat tregojnë se kostot janë rritur ndjeshëm vitet e fundit. Që nga viti 2019, taksa për pasagjer është dyfishuar, duke kaluar nga 7.30 euro në 15.50 euro, ndërsa tarifat aeroportuale janë rritur me rreth 50%. Paralelisht, trafiku ajror në këtë aeroport ka shënuar rënie.
Megjithatë, kompania do të vijojë të operojë në Berlin nga baza të tjera jashtë Gjermanisë, por reduktimi i pranisë së saj konsiderohet një goditje për lidhjet ajrore dhe konkurrencën në tregun e fluturimeve nga kryeqyteti gjerman. /skyweb.al
