Dalja me fitim nga investimi në pasuri të paluajtshme në Tiranë në vitin 2026 mbetet një mundësi reale, por jo një garanci. Probabiliteti për të realizuar fitim vlerësohet si mesatar, çka nënkupton se investimi mund të rezultojë i suksesshëm, por kërkon strategji të kujdesshme dhe vendimmarrje të mirëinformuar.
Studimi I Investrpa thekson se për të pasur një shans real për fitim, investitorët duhet të jenë të përgatitur ta mbajnë pronën për një periudhë zakonisht nga 3 deri në 5 vjet.
Kjo periudhë konsiderohet e nevojshme për të përballuar jo vetëm kostot e hyrjes dhe daljes nga tregu, por edhe për të amortizuar luhatjet e mundshme të çmimeve që mund të ndodhin në afat të shkurtër
Një element kyç që ndikon ndjeshëm në rezultatin final janë kostot e transaksionit. Në Tiranë, këto kosto përfshijnë tarifat e noterisë, regjistrimin e pronës, komisionet e agjencive imobiliare si për blerjen ashtu edhe për shitjen, si dhe taksat e transferimit.
Në total, ato zakonisht variojnë nga 6% deri në 10% e vlerës së pronës. Për një apartament tipik me vlerë nga 120,000 deri në 150,000 euro, kjo përkthehet në një kosto shtesë prej rreth 8,000 deri në 15,000 euro.
Kjo do të thotë se çdo investitor duhet të llogarisë një rritje të konsiderueshme të vlerës së pronës përpara se të arrijë pikën e fitimit.
Sipas analizës, faktori më i rëndësishëm që rrit gjasat për të dalë me fitim është blerja e një prone nën nivelin e tregut. Kjo strategji bëhet edhe më efektive kur prona ndodhet në zona të preferuara për banim, ku kërkesa është e qëndrueshme ose në rritje.
Prona të tilla jo vetëm që kanë potencial më të madh për rritje në vlerë, por ofrojnë edhe të ardhura më të qëndrueshme nga qiraja gjatë periudhës së mbajtjes. Për më tepër, ato kanë më shumë gjasa të tërheqin blerës në momentin e rishitjes, duke e bërë procesin më të shpejtë dhe më të sigurt.
Nga ana tjetër, tregu i pasurive të paluajtshme në Tiranë ka filluar të tregojë shenja të një ngadalësimi të lehtë krahasuar me periudhën dinamike të viteve 2024 dhe fillimit të 2025.
Në atë periudhë, kërkesa e lartë dhe ritmi i shpejtë i transaksioneve krijuan një ambient ku shumë prona shiteshin në kohë relativisht të shkurtra. Megjithatë, zhvillimet më të fundit tregojnë se tregu po bëhet më selektiv dhe më i ndjeshëm ndaj faktorëve si çmimi dhe cilësia e pronës. /tvscan.al
