Bashkitë dhe subjektet publike përgjegjëse për strehimin mund të ndërtojnë komplekse banimi dhe të shesin një pjesë të apartamenteve me çmimin e tregut.
Modeli i ri parashikohet në projektligjin për ndryshimin e ligjit “Për strehimin social”, i cili është hedhur për konsultim. Sipas projektit, në të njëjtin kompleks mund të përfshihen banesa sociale me qira, banesa me kosto të ulët dhe apartamente të destinuara për shitje në tregun e lirë.
Apartamentet e tregut të lirë nuk do të jepen me çmime sociale, por do të shiten sipas vlerës së tregut.
Të ardhurat e siguruara nga shitja e tyre do të përdoren për financimin, zgjerimin dhe mirëmbajtjen e programeve të strehimit social.
Në këtë mënyrë, bashkitë mund të hyjnë edhe në rolin e zhvilluesit dhe shitësit të pronave, ndërsa fitimet do të rikthehen te fondi i banesave sociale. Qëllimi është që programet e strehimit të mos varen vetëm nga fondet e buxhetit të shtetit ose të bashkive.
Projektligji synon krijimin e një modeli vetëfinancues, ku shitja e një pjese të apartamenteve financon banesat për familjet që nuk mund t’i përballojnë çmimet e tregut.
Shitja e pronave do të duhet të kryhet përmes procedurave transparente dhe konkurruese.
Përbërja e komplekseve, numri i banesave që do të shiten dhe mënyra e administrimit të parave do të përcaktohen më vonë me vendim të Këshillit të Ministrave.
Relacioni argumenton se modeli mund të mundësojë ndërtimin e projekteve më të mëdha dhe rritjen e numrit të banesave sociale dhe atyre me kosto të ulët. Nisma parashikon gjithashtu përfshirjen e sektorit privat në krijimin e fondit publik të banesave. /skyweb.al
