Shqipëria është përfshirë nga revista “Forbes” mes destinacioneve të rekomanduara për amerikanët që planifikojnë të kalojnë pensionin jashtë Shteteve të Bashkuara gjatë vitit 2026.
Në renditjen e saj, revista ka analizuar 24 shtete dhe 96 destinacione, duke vlerësuar mundësitë që ato ofrojnë për një jetesë më të përballueshme pas daljes në pension.
Për Shqipërinë janë veçuar Tirana, Durrësi, Vlora dhe Saranda si qytetet më të përshtatshme për të huajt që kërkojnë të vendosen për një periudhë të gjatë.
Një nga arsyet kryesore të përzgjedhjes është kostoja e jetesës, e cila mbetet dukshëm më e ulët krahasuar me mesataren në SHBA.
Kjo u jep pensionistëve amerikanë mundësinë të reduktojnë shpenzimet, duke ruajtur një standard të mirë jetese.
Në vlerësim janë marrë parasysh edhe klima, shërbimet, kujdesi shëndetësor, rreziqet natyrore dhe niveli i mikpritjes ndaj qytetarëve amerikanë. Forbes evidenton gjithashtu avantazhin e klimës mesdhetare dhe afërsinë me bregdetin.
Tirana ofron akses më të gjerë në shërbime dhe jetë urbane, ndërsa Durrësi, Vlora dhe Saranda shihen si alternativa për ata që preferojnë jetesën pranë detit.
Përfshirja në këtë listë e vendos Shqipërinë në hartën e destinacioneve që po tërheqin jo vetëm turistë, por edhe të huaj që kërkojnë të jetojnë në vend për një periudhë afatgjatë.
