Evan Fry lindi në vitin 2003, në një kohë kur telefonat celularë kishin filluar tashmë të zëvendësonin orët e dorës. Megjithëse është rritur me pajisje që tregojnë kohën kudo (telefon, laptop, TV), ai ka ndërtuar një koleksion me mbi 35 ora, me vlerë mesatarisht 1,000–2,000 dollarë secila. Pjesa e tij më e çmuar është një Tag Heuer Carrera, ndërsa synon të blejë një H. Moser & Cie që mund të kushtojë rreth 50,000 dollarë, shkruan CNN.
Në moshën 22-vjeçare, Fry përfaqëson një trend në rritje të të rinjve të Gen Z që po rikthehen te orët. Sipas kompanive si Bezel, të rinjtë nën 30 vjeç përbëjnë një pjesë të madhe të blerësve dhe shpesh shpenzojnë më shumë për një orë të vetme. Edhe marka si Longines raportojnë rritje të interesit nga të rinjtë, sidomos për restaurimin e orëve të trashëguara.
Interesi i Fry lidhet me historinë dhe nostalgjinë: ai koleksionon ora vintage nga dekada të ndryshme dhe i konsideron si objekte me vlerë emocionale dhe kulturore. Ky trend reflektohet edhe më gjerë, sipas Chrono24, të rinjtë po blejnë gjithnjë e më shumë ora klasike elegante, si Cartier Tank Louis Cartier apo Vacheron Constantin Patrimony.
Sipas Dahyn Lee, kjo gjeneratë, e rritur në një botë dixhitale, ka dëshirë për objekte reale dhe të prekshme. Ora shpesh shërben si lidhje me të kaluarën, madje edhe për periudha që ata nuk i kanë jetuar.
Një tjetër ndryshim është se kufijtë gjinorë po zbehen: të rinjtë zgjedhin ora pa u ndikuar nga kategorizimet “për burra” apo “për gra”. Edhe ndikimi i personazheve të famshëm, si Timothée Chalamet, ka ndihmuar në këtë qasje më të lirë dhe eksperimentuese ndaj stilit. /skyweb.al
