Sektori i peshkimit në Shqipëri është tkurrur gjatë vitit 2025, pavarësisht rritjes së numrit të subjekteve të licencuara për këtë aktivitet.
Sipas të dhënave të INSTAT, gjatë vitit 2025 sasia e peshkut të zënë nga të gjitha kategoritë ujore ishte 15,153 tonë. Krahasuar me vitin 2024, kur zënia ishte 16,452 tonë, kjo përbën një rënie me 7.9%.
Rënia më e ndjeshme është regjistruar në disa prej kategorive kryesore të peshkimit. Akuakultura, e cila zë edhe peshën më të madhe të sektorit me 43.2% të totalit, ra me 8.6%, duke zbritur nga 7,165 tonë në vitin 2024 në 6,549 tonë në vitin 2025.
Tkurrje ka pasur edhe në peshkimin bregdetar, ku zëniet ranë me 12.1%, nga 554 tonë në 487 tonë. Edhe lagunat shënuan rënie me 8.2%, duke kaluar nga 146 tonë në 134 tonë.
Ndryshe nga këto kategori, molusqet shënuan rritjen më të madhe vjetore. Sasia e tyre u rrit me 158.2%, nga 213 tonë në vitin 2024 në 550 tonë në vitin 2025.
Në strukturën e përgjithshme të zënieve, akuakultura përbën 43.2% të totalit, peshkimi detar 29.2%, ndërsa ujërat e brendshme 19.8%.
Ndërkohë, numri i subjekteve të licencuara për aktivitet peshkimi është rritur. Në vitin 2025 rezultojnë 854 subjekte të licencuara, ose 21 më shumë se në vitin 2024.
Kjo tregon se, edhe pse aktiviteti i licencuar është zgjeruar në numër operatorësh, sasia totale e peshkut të zënë ka rënë.
Të dhënat sinjalizojnë një vit më të dobët për sektorin e peshkimit, ku rritja e licencave nuk është përkthyer në më shumë prodhim.
