Prodhuesi gjerman i makinave Volkswagen po shqyrton një valë të re të madhe ristrukturimi, e cila mund të prekë deri në 100 mijë vende pune në nivel global gjatë viteve të ardhshme.
Sipas mediave gjermane, që citojnë burime brenda kompanisë, menaxhmenti po diskuton uljen e numrit të punonjësve nga rreth 657 mijë që janë aktualisht në të gjithë botën.
Plani i ri do të ishte një zgjerim i ndjeshëm i objektivit të shpallur më herët nga kompania, që parashikonte eliminimin e 50 mijë vendeve pune deri në vitin 2030.
Gazeta “Manager Magazin” raporton se, sipas planeve të brendshme, mund të shkurtohen edhe 50 mijë deri në 60 mijë vende pune shtesë, megjithëse ende nuk është e qartë nëse procesi do të përfundojë deri në vitin 2030 apo më vonë.
Drejtori ekzekutiv i Volkswagen, Oliver Blume, mësohet se ia ka paraqitur planet e ristrukturimit bordit drejtues të kompanisë. Sipas raportimeve, dokumenti i paraqitur nuk përcaktonte një numër përfundimtar të saktë të vendeve të punës që mund të preken.
Përveç shkurtimeve, Volkswagen po shqyrton edhe mundësinë e mbylljes së disa fabrikave në Gjermani. Në afat të mesëm, sipas informacioneve të publikuara, në diskutim janë të paktën katër uzina: Hanover, Zwickau, Emden dhe fabrika e Audi-t në Neckarsulm.
Plani do të parashikonte mbylljen e prodhimit në këto fabrika pas përfundimit të modeleve aktuale që prodhohen aty.
Megjithatë, mbetet e paqartë se si mund të zbatohet një reduktim kaq i madh i vendeve të punës, pasi në Volkswagen garancia për sigurinë e punës është në fuqi deri në fund të vitit 2030, ndërsa te Audi kjo mbrojtje vlen deri në vitin 2033.
Nëse planet konfirmohen, kjo do të shënonte një nga valët më të mëdha të ristrukturimit në historinë e grupit Volkswagen dhe një sinjal të fortë për presionin që po përjeton industria gjermane e automobilave.
