Qeveria ka miratuar një lehtësi të re fiskale për kompanitë që operojnë ose realizojnë investime për llogari të subjekteve të licencuara në industrinë e mbrojtjes.
Nga TVSH-ja do të përjashtohen makineritë dhe pajisjet që lidhen drejtpërdrejt me investime me vlerë të barabartë ose më të madhe se 500 milionë lekë.
Përfitues do të jenë subjektet e licencuara për prodhimin, tregtimin, kërkimin dhe zhvillimin e armëve, municioneve, pajisjeve dhe teknologjive ushtarake, si edhe kompanitë që kryejnë investime për llogari të tyre.
Lista e mallrave që përfitojnë nga lehtësia fiskale është e gjerë dhe përfshin makineri për përpunimin e metaleve, pajisje saldimi, furra industriale, pompa, kompresorë, gjeneratorë, sisteme komunikimi, radarë, pajisje optike dhe laboratorike.
Në listë përfshihen gjithashtu automjete, kamionë, mjete transporti për qëllime të posaçme, helikopterë, avionë, dronë dhe pjesë të tyre.
Për të përfituar nga përjashtimi, subjektet duhet të paraqesin pranë autoriteteve doganore licencën e vlefshme, një deklaratë që pajisjet do të përdoren drejtpërdrejt për aktivitetin e licencuar dhe një relacion që shpjegon lidhjen ndërmjet importuesit dhe kompanisë së industrisë së mbrojtjes.Vendimi synon të ulë kostot e investimeve të mëdha në industrinë ushtarake dhe të nxisë ngritjen e kapaciteteve prodhuese në këtë sektor. /skyweb.al
