Një organizatë gjermane për të drejtat digjitale ka ngritur një padi penale kundër Meta-s dhe kompanive të lidhura me syzet inteligjente Ray-Ban Meta, duke argumentuar se pajisjet mund të përdoren për regjistrime pa dijeninë e personave që ndodhen pranë përdoruesit.
Organizata HateAid i është drejtuar autoriteteve gjermane duke kërkuar hetim ndaj drejtuesve të Meta-s dhe kompanive që lidhen me markat Ray-Ban dhe Oakley, lidhur me përdorimin e syzeve inteligjente.
Në qendër të ankesës janë syzet Ray-Ban Meta, të cilat në pamje të parë duken si syze të zakonshme, por kanë kamera dhe funksione të inteligjencës artificiale.
Sipas HateAid, ky kombinim krijon shqetësime serioze për privatësinë, pasi një person mund të fotografohet ose filmohet nga përdoruesi pa e kuptuar se po regjistrohet.
Një nga shqetësimet kryesore lidhet me faktin se kamera është e integruar në kornizën e syzeve. Pajisjet kanë një dritë LED që sinjalizon kur kamera po përdoret, por kritikët argumentojnë se kjo shenjë mund të mos jetë gjithmonë e dukshme për personat që ndodhen pranë përdoruesit.
HateAid kërkon që shitja e këtyre syzeve të ndalohet në Gjermani dhe që, nëse ato lejohen të qëndrojnë në treg, të pajisen me masa më të qarta sigurie. Organizata kërkon që kamera të jetë më e dallueshme dhe sinjalizimi i regjistrimit të jetë më i vështirë për t’u anashkaluar.
Sipas organizatës, shqetësimi nuk është vetëm teknik. HateAid paralajmëron se syzet inteligjente mund ta bëjnë regjistrimin e fshehtë shumë më të lehtë dhe mund të përdoren për të cenuar privatësinë e qytetarëve.
Gjermania ka rregulla të forta për regjistrimet e fshehta dhe mbrojtjen e të dhënave. Autoriteti gjerman përgjegjës për rrjetet dhe komunikimet, BNetzA, ka deklaruar se mbajtja, importimi apo shitja e syzeve inteligjente nuk është në vetvete e ndaluar, për sa kohë funksioni i regjistrimit është i identifikueshëm, për shembull përmes një sinjali optik.
Ndërkohë, autoritetet gjermane po vlerësojnë ankesën për të përcaktuar nëse ekzistojnë bazat për nisjen e një hetimi më të thelluar.
Çështja mund të kthehet në një precedent të rëndësishëm për mënyrën se si Evropa do të trajtojë syzet me kamera dhe inteligjencë artificiale.
Ndryshe nga një telefon, i cili zakonisht mbahet në dorë dhe e bën më të dukshëm aktin e fotografimit apo filmimit, një kamerë e vendosur në syze mund të regjistrojë në drejtimin ku përdoruesi po shikon, duke e bërë më të vështirë për personat përreth të kuptojnë se po filmohet.
Rasti rikthen në qendër të debatit një pyetje që pritet të bëhet gjithnjë e më e rëndësishme me përhapjen e pajisjeve të veshshme me inteligjence artificiale.
