Konsumatorët shqiptarë rezultojnë ndër më pak aktivët në Europë për blerjet online. Të dhënat e Eurostat për vitin 2024 tregojnë se vetëm 37.5% e individëve në Shqipëri kanë kryer blerje përmes internetit, duke lënë pas vetëm Malin e Zi me 34.6%.
Shifra është shumë më e ulët krahasuar me mesataren e Bashkimit Europian, ku 71.7% e qytetarëve përdorin rregullisht platformat online për blerje, ndërsa në vende si Irlanda dhe Holanda kjo përqindje i kalon 90%.
Ekspertët e lidhin nivelin e ulët të tregtisë elektronike në Shqipëri jo vetëm me mangësitë e dixhitalizimit, por edhe me infrastrukturën financiare të pazhvilluar, pasi pagesat në vend vijojnë të mbeten kryesisht me para në dorë.
Një tjetër problem është mosbesimi i qytetarëve tek platformat online, si edhe mungesa e të ardhurave, që kufizon mundësitë për të bërë blerje në internet. Shqipëria ende vuan nga mangësitë ligjore për mbrojtjen e konsumatorit dhe nga mungesa e logjistikës efikase të shpërndarjes, çka e bën të vështirë ofrimin e shërbimeve të shpejta dhe cilësore, sidomos jashtë qyteteve të mëdha.
Nga ana tjetër, përdorimi i kartave bankare, pagesave me celular dhe bankingut online në Shqipëri vijon të jetë shumë më i ulët se në vendet e tjera europiane. Shumë biznese të vogla e të mesme nuk ofrojnë ende sisteme të shitjeve online, duke i konsideruar ato të kushtueshme dhe të ndërlikuara.
Megjithatë, ekspertët theksojnë se tregtia elektronike ka potencial të madh rritjeje në Shqipëri, pasi mund të nxisë produktivitetin, formalizimin e ekonomisë dhe konkurrueshmërinë e bizneseve. Sfidë mbetet struktura demografike e vendit, me pakësimin e moshave të reja dhe dominimin e grupmoshave më të vjetra, që e frenon përhapjen e teknologjisë. /Skyweb.al
