Kryeministri Edi Rama ka goditur me tone të forta fenomenin e ndërtimeve abuzive dhe deformimeve urbane në Tiranë, duke akuzuar ndërtues dhe arkitektë që, sipas tij, ndryshojnë projektet për interesa fitimi.
“Ka një ndërtues këtu në Tiranë që ka marrë një leje me një fasadë që ishte e gjitha e gjelbër, këmbë peme nuk ka aty, por nuk do marrë më kurrë leje, sepse njerëzit që kanë paguar aty, kanë paguar edhe pemët,” deklaroi Rama, duke shtuar se qytetarët shpesh përballen me realitete krejt të tjera nga ato që u janë premtuar.
Ai ironizoi edhe shfrytëzimin e trotuareve nga lokalet, ku qytetarët detyrohen të ecin rresht për një. “Na detyrojnë të gjithëve të ecim si në kohët e luftës: burri para, gruaja mbrapa,” tha kryeministri.
Rama u bëri thirrje arkitektëve të mos tolerojnë deformimin e projekteve të tyre, duke kujtuar se nëse “bien në grackën e ndërtuesve”, do mbeten vetë përgjegjës. “Bëhuni burra dhe vërini kufijtë ndërtuesve: ‘Ky është projekti im dhe pikë!’” theksoi ai.
Kreu i qeverisë nënvizoi se toleranca ndaj abuzimeve ka marrë fund dhe se mbrojtja e hapësirave publike është detyrim i përbashkët për të siguruar një jetë urbane të denjë për qytetarët./skyweb.al
