Kryeministri Edi Rama prezantoi paketën e re ligjore për mbrojtjen e pronës dhe territorit, duke paralajmëruar ndëshkime të rënda penale për të gjithë zinxhirin e përgjegjësisë në rastet e ndërtimeve pa leje.
Sipas kryeministrit, nga arkitektët deri te supervizorët dhe ndërtuesit do të mbahen përgjegjës kur projekti ndryshohet në kundërshtim me ligjin. Ai theksoi se çdo profesionist që hesht dhe nuk denoncon deformimet e projektit do të përballet me pasoja penale.
Një nga fenomenet më shqetësuese, sipas kreut të qeverisë, është shitja e apartamenteve dy herë. Në këto raste, ndërtuesit do të përfshihen në listën e zezë dhe pasuritë e tyre do të konfiskohen. Ndërtesat e bllokuara do të merren nga shteti për t’u vijuar më tej si projekte publike, shkruan Skyweb.al.
“E rëndësishme është të bllokohet i gjithë zinxhiri. Nuk do të ketë më ndërtues që shkelin ligjin dhe arkitektë që pranojnë ndryshimet në heshtje. Për këdo që pranon deformimin e projektit, kjo do të konsiderohet vepër penale,” u shpreh Rama.
Ai bëri të qartë se çdo godinë që nuk merr certifikatën e përdorimit nuk do të lidhet me energji elektrike apo ujë. “Kjo nuk do të tolerohet më,” shtoi kryeministri.
Pjesë e paketës së re është edhe një rregullore për shfrytëzimin e hapësirave publike nga bizneset. Sipas Ramës, çdo subjekt që vendos tavolina apo karrige jashtë ambienteve të veta do të kontribuojë me mbjelljen e një peme, ndërsa tendat dhe platformat do të lejohen vetëm sipas standardeve të përcaktuara.
Kryeministri vuri në dukje se Shqipëria nuk mund të arrijë objektivin e anëtarësimit në BE në vitin 2030 me ndërtime të paligjshme, duke theksuar se aksioni për çlirimin e hapësirave publike do të vazhdojë pa ndërprerje.
Ai u ndal edhe te një tjetër problem, zjarrvëniet e qëllimshme, duke paralajmëruar se këto akte duhet të ndëshkohen në të njëjtin nivel me veprat më të rënda penale, siç është vrasja. /Skyweb.al
