Taksat e larta mbi karburantet në Shqipëri po shtyjnë qytetarët të kalojnë kufirin për të furnizuar makinat më lirë, duke krijuar fluks të pazakontë në pikën kufitare të Qafë Thanës.
Gjatë këtij fundjave, në hyrje-dalje mes Shqipërisë dhe Maqedonisë së Veriut janë krijuar radhë automjetesh dhe pritje të gjata, ndërsa autoritetet e të dyja vendeve kanë operuar me tre sportele për të përballuar situatën.
Megjithatë, për shkak të numrit të lartë të mjeteve, në disa momente qarkullimi është rënduar ndjeshëm, duke kthyer kalimin kufitar në një pikë të mbingarkuar.
Burimet bëjnë me dije se fluksi lidhet drejtpërdrejt me diferencën e madhe të çmimeve të karburantit. Qindra drejtues mjetesh nga Pogradeci, Prrenjasi, Rrajca dhe zonat përreth po udhëtojnë drejt Strugës për të mbushur rezervuarët dhe për të blerë produkte ushqimore më të lira.
Diferenca në çmim është e konsiderueshme. Në Shqipëri, një litër naftë shitet rreth 218 lekë, ndërsa në Maqedoninë e Veriut kushton rreth 95 denarë, ose afërsisht 150 lekë për litër.
Kjo diferencë prej rreth 60-70 lekësh për litër po e bën ekonomikisht të leverdishëm udhëtimin përtej kufirit, pavarësisht kostos së rrugës dhe kohës së pritjes.
Fenomeni po shihet si një pasojë direkte e nivelit të lartë të taksave mbi karburantet në Shqipëri, që vazhdojnë të mbajnë çmimet ndër më të lartat në rajon.
Autoritetet kufitare u bëjnë thirrje qytetarëve të shmangin oraret e pikut dhe të tregojnë durim, ndërsa pritet që fluksi të vijojë edhe gjatë ditëve në vijim, nëse diferencat e çmimeve mbeten të njëjta.
