Qeveria ka prezantuar një paketë të re masash ligjore që synon mbrojtjen e pronës dhe territorit, duke vendosur në qendër penalizimet për ndërtimet pa leje. Paketa ligjore vjen pas aksionit të ndërmarrë prej disa javësh për lirimin e hapësirave publike dhe prishjen e ndërtimeve pa leje.
Sipas Ministrit të Drejtësisë, Ulsi Manja, çdo ndërtim pa leje do të ndalohet që në fazën e parë, që nga hapja e kantierit dhe deri në marrjen e certifikatës së përdorimit. Punimet që tejkalojnë më shumë se 2% të lejes së ndërtimit do të konfiskohen, ndërsa ndërtime që tejkalojnë mbi 10% – duke përfshirë katet mbi dhe nën dhe – do të përdoren për strehim social ose do të prishen.
Për ndërtuesit abuzivë do të krijohet një “listë e zezë”, ku subjektet e regjistruara përjashtohen nga e drejta për të marrë leje ndërtimi deri në 5 vite. Masat e reja kanë karakter administrativ dhe penal, duke reflektuar situatën e krijuar nga ndërtimet pa leje.
Ministri Manja nënvizoi se kjo paketë ligjore nuk është vetëm një ndërhyrje për të ndëshkuar shkelësit, por edhe një hap drejt sigurisë juridike për qytetarët dhe ndërtuesit e ligjshëm. Reforma e mbrojtjes së territorit do të garantojë zhvillimin e qëndrueshëm të pronës dhe territorit.
Një nga risitë e paketës është inventarizimi i hapësirave publike nga njësitë vendore në një regjistër kadastral, që do të ndihmojë në menaxhimin më të mirë të territorit dhe parandalimin e abuzimeve. / Skywerb.al
