Kontrollet manuale të pasaportave janë rikthyer në disa aeroporte europiane, pasi sistemi i ri i automatizuar i Bashkimit Europian për verifikimin në kufi ka hasur probleme serioze në funksionim.
Një nga rastet më të forta është regjistruar në aeroportin e Linate në Milano, ku mbi 100 pasagjerë humbën fluturimin drejt Manchesterit për shkak të vonesave të krijuara në kontrollin e dokumenteve.
Sipas raportimeve, një avion me kapacitet 148 pasagjerë u detyrua të nisej me vetëm 27 persona në bord, pasi pjesa tjetër nuk arriti të kalojë në kohë procedurat e kontrollit.
Problemet lidhen me hyrjen në funksion të sistemit EES, Entry Exit System, platforma e re që regjistron hyrjet dhe daljet e shtetasve nga vendet jashtë Bashkimit Europian.
Prej disa ditësh, ky sistem po shfaq vonesa dhe bllokime në disa pika kufitare në Europë, duke krijuar radhë të gjata dhe kaos në aeroporte.
Si pasojë, autoritetet në disa raste janë detyruar të rikthejnë verifikimet tradicionale me agjentë, për të përballuar fluksin dhe për të shmangur situata të ngjashme.
Ngjarja në Milano vë në dyshim gatishmërinë e plotë të sistemit të ri, në një moment kur trafiku ajror në Europë po rritet ndjeshëm dhe kërkon procese më efikase në kufi. /skyweb.al
