Mediat sllovene raportojnë se kompania “Geaprodukt d.o.o” ka urdhëruar tërheqjen e menjëhershme nga tregu të një sasie specash të kuq djegës me origjinë nga Shqipëria, pasi analizat laboratorike kanë zbuluar praninë e tepruar të pesticideve acetamiprid, formetanat dhe flonikamid.
Sipas njoftimit, produkti i tërhequr i përket serisë LOT: 3505 dhe është shpërndarë në treg gjatë periudhës 24 gusht – 4 shtator 2025.
Specat ishin paketuar në kuti kartoni primare dhe PVC sekondar.
Geaprodukt ka kërkuar që klientët të kthejnë produktin në vendin e blerjes ose, nëse kjo nuk është e mundur, ta asgjësojnë vetë me kujdes. Kompania ka paralajmëruar gjithashtu konsumatorët që mund të kenë konsumuar ose pasur kontakt me specat, të lajnë mirë duart dhe, në rast shfaqjeje të shqetësimeve shëndetësore si probleme me tretjen apo të përziera, të kërkojnë menjëherë ndihmë mjekësore.
Eksportet bujqësore nga Shqipëria drejt Bashkimit Europian po përballen gjithnjë e më shumë me kontrolle të forta lidhur me praninë e mbetjeve kimike dhe metaleve të rënda në ushqime. Vetëm pak ditë më parë, u raportua bllokimi i një sasie prej 5.562 kg pjeshkë shqiptare, pasi analizat zbuluan nivele të larta të nikelit, përtej kufijve të lejuar nga BE.
Ky rast është raportuar më 22 gusht 2025 nëpërmjet Sistemit të Alertimit të Shpejtë për Ushqimin dhe Ushqimin për Kafshët (RASFF), i cili ka njoftuar edhe Autoritetin Kombëtar të Ushqimit në Shqipëri për ndërmarrjen e masave. /skyweb.al
