Dy shtetas kinezë janë vënë në pranga nga policia, si pjesë e një grupi të organizuar që mashtronte qytetarët përmes një faqeje interneti të falsifikuar, e cila imitonte faqen zyrtare të Postës Shqiptare.
Sipas njoftimit të Policisë së Shtetit, hetimet janë zhvilluar nga Drejtoria e Hetimit të Krimit Kibernetik, pas ankesave të shumta të qytetarëve që kishin marrë mesazhe mashtruese në celular. Këto mesazhe i drejtonin përdoruesit drejt një faqeje identike me atë të Postës Shqiptare, me qëllim marrjen e të dhënave të tyre personale dhe bankare.
Si rezultat i operacionit hetimor, u arrestuan shtetasit e huaj C. F., 51 vjeç, dhe H. Y., 45 vjeç, të cilët kishin hyrë në Shqipëri më 27 tetor 2025.
Gjatë kontrollit të kryer në ambientin ku qëndronin, policia gjeti dhe sekuestroi si prova materiale 17 telefona celularë, një laptop, 12 pasaporta, 11 karta bankare, 7 karta identiteti, një patentë si dhe një shumë parash në valuta të ndryshme.
Autoritetet njoftojnë se hetimet po vijojnë për zbardhjen e plotë të aktivitetit kriminal dhe për identifikimin e mundshëm të personave të tjerë të përfshirë në këtë rrjet.
Policia u bën thirrje qytetarëve të tregojnë kujdes maksimal ndaj çdo mesazhi apo faqeje interneti që kërkon të dhëna personale ose bankare, pasi mund të bëhet fjalë për tentativa mashtrimi. /Skyweb.al
