Një lindje e pazakontë gjatë një fluturimi të Caribbean Airlines nga Kingston drejt New York City ka sjellë në vëmendje një çështje delikate: shtetësinë e të porsalindurit.
Ngjarja ndodhi gjatë udhëtimit, kur një grua shtatzënë solli në jetë foshnjën në bord, me ndihmën e ekuipazhit. Nëna dhe fëmija janë në gjendje të mirë shëndetësore pas mbërritjes, ndërsa një moment interesant u regjistrua edhe gjatë komunikimit me kullën e kontrollit, ku u propozua me shaka emri “Kennedy”.
Megjithatë, ajo që e bën këtë rast të veçantë është paqartësia mbi shtetësinë e foshnjës. Nëse prindërit nuk janë amerikanë, gjithçka varet nga vendndodhja e saktë e avionit në momentin e lindjes. Sipas rregullave të Departamentit Amerikan të Shtetit, një lindje brenda hapësirës ajrore amerikane deri në 12 milje nga bregdeti, mund t’i japë automatikisht shtetësi amerikane foshnjës, në bazë të Amendamenti i 14-të i Kushtetutës së SHBA.
Për këtë arsye, autoritetet do të duhet të verifikojnë koordinatat e sakta të fluturimit në momentin e lindjes. Ndërkohë, debatet për këtë të drejtë janë rikthyer edhe në skenën politike, pas një urdhri ekzekutiv të ndërmarrë nga Donald Trump, i cili synonte kufizimin e saj, por që është bllokuar nga gjykatat dhe pret vendim përfundimtar.
Raste të tilla mbeten tepër të rralla: sipas një studimi të Bowling Green State University, vetëm 74 lindje janë regjistruar në fluturime komerciale në gati një shekull./skyweb.al
