Aeroporti Ndërkombëtar i Tiranës ka shënuar një rritje të fortë të trafikut ajror gjatë periudhës janar–gusht 2025, sipas të dhënave të publikuara nga zëvendëskryeministrja dhe ministrja e Infrastrukturës dhe Energjisë, Belinda Balluku.
Në vetëm tetë muaj, aeroporti ka regjistruar 7,833,109 pasagjerë, një rritje prej 9% krahasuar me vitin 2024.
Gjithashtu, janë kryer 47,462 fluturime, duke reflektuar një rritje prej 2%.
Pasagjerët janë shpërndarë në 137 destinacione ndërkombëtare, çka e bën Tiranën një prej nyjeve më të rëndësishme ajrore të rajonit.
Dita me fluksin më të madh rezultoi 11 gushti, kur në aeroport u përpunuan 53,076 pasagjerë, shifra më e lartë ditore e regjistruar ndonjëherë.
Në publikimin e saj, Balluku i cilësoi këto shifra si dëshmi të rritjes së pandalshme të turizmit dhe të rolit gjithnjë e më të madh që Shqipëria po fiton në hartën ajrore europiane.
“Shifra që flasin vetë! Shqipëria turistike!” – u shpreh zv.kryeministrja. /skyweb.al
