Shoqata e Industrisë së Përpunimit të Qumështit i është drejtuar zyrtarisht Ministrisë së Bujqësisë dhe asaj të Financave, duke kërkuar uljen dhe unifikimin e normës së TVSH-së në nivelin 10% si në blerje të qumështit nga fermerët, ashtu edhe në shitjen e produkteve të përpunuara.
Sipas industrisë, fabrikat e qumështit po përballen me rritje të vazhdueshme të kostove, për shkak të çmimit të lartë të lëndës së parë në Shqipëri, i cili rezulton më i shtrenjtë se mesatarja e vendeve të BE-së. Shoqata argumenton se ulja dhe barazimi i TVSH-së do të lehtësonte presionin financiar mbi përpunuesit dhe do të pengonte rritjen e mëtejshme të çmimeve për konsumatorët, duke ruajtur stabilitetin e tregut.
Në kërkesën e saj, Shoqata thekson se kjo masë është në përputhje me praktikat e Bashkimit Europian, ku shumica e vendeve aplikojnë norma të reduktuara të TVSH-së për ushqimet bazë (5–10%), ndërsa disa shtete përdorin edhe normë 0% për produkte si qumështi, buka, vezët dhe frutat e freskëta.
“Barazimi i TVSH-së në blerje dhe në shitje do të mbështeste konsumatorin, do të ulte kostot e jetesës dhe do të garantonte akses në ushqimet bazë. Kjo do të mundësonte trajtim të njëjtë për fermat e paformalizuara dhe për industrinë që përpunon qumështin”, thuhet në prononcimin e Shoqatës.
Në dokument theksohet edhe se procesi i integrimit europian dhe kërkesat e Kapitullit 12 do të transformojnë zinxhirin “nga ferma në tavolinë”, duke unifikuar standardet dhe hapur rrugën për eksport drejt tregjeve të BE-së.
Ndërkohë, në paketën fiskale 2026 qeveria ka propozuar një skemë kompensimi 10% të TVSH-së për fermerët që disponojnë NIPT dhe shesin prodhimin tek grumbulluesit, përpunuesit ose agroturizmet. Skema synon formalizimin e sektorit dhe uljen e kostove të inputeve bujqësore, duke përfshirë farat, fidanët dhe plehrat.
Sipas relacionit shoqërues, blerësit do të detyrohen të lëshojnë faturë të fiskalizuar për çdo transaksion, ndërsa fermerët duhet ta disponojnë këtë faturë për të përfituar kompensimin. Kjo masë synon të ulë informalitetin dhe të garantojë njohjen e shpenzimeve të zbritshme në sistemin tatimor. /skyweb.al
