Bordi i Transparencës ka vendosur uljen e çmimeve tavan të karburanteve në vend. Duke nisur nga ora 17:30 e kësaj të marte, 17 nëntor, nafta do të tregtohet me çmim maksimal 207 lekë për litër, ndërsa benzina me 164 lekë për litër.
Vendimi është bërë publik nga ministri i Financave, Petrit Malaj, i cili ka njoftuar çmimet e reja të shitjes me pakicë dhe shumicë për naftën, benzinën dhe gazin e lëngshëm.
Sipas vendimit, çmimi maksimal i naftës me pakicë ulet nga 210 në 207 lekë për litër, ose 3 lekë më pak krahasuar me vendimin e mëparshëm të Bordit të Transparencës.
Benzina do të shitet me pakicë jo më shumë se 164 lekë për litër, nga 165 lekë që ishte më parë, ndërsa gazi i lëngshëm i naftës ulet nga 71 në 70 lekë për litër.
Ndryshime ka edhe në çmimet e shitjes me shumicë. Nafta do të tregtohet maksimalisht me 195 lekë për litër, benzina me 152 lekë dhe gazi me 58 lekë për litër.
Çmimet e përcaktuara nga Bordi janë kufij maksimalë, që do të thotë se kompanitë e karburanteve nuk mund t’i shesin produktet mbi këto nivele, por kanë të drejtë të aplikojnë çmime më të ulëta.
Vendimi hyn në fuqi më 17 nëntor, në orën 17:30, dhe përcakton çmimet që do të zbatohen në treg deri në një vendimmarrje të re të Bordit të Transparencës.
Bordi i Transparencës përcakton çmimet maksimale të karburanteve duke marrë në konsideratë kuotimet ndërkombëtare të produkteve të naftës, detyrimet fiskale dhe marzhet e tregtimit.
















