Çmimi i arit ka rënë nën 4,000 dollarë për ons këtë fillim jave, pasi pritshmëritë për përmirësimin e marrëdhënieve tregtare midis Shteteve të Bashkuara dhe Kinës ulën kërkesën për ar si aset të sigurt. Çmimi ka zbritur me 2.9%, në 3,994 dollarë.
Sipas analistëve, lajmet për një marrëveshje të mundshme tregtare mes SHBA-së dhe Kinës kanë zbutur ndjesinë e pasigurisë që zakonisht nxit kërkesën për ar. Një marrëveshje e tillë mund të çojë në uljen e disa tarifave amerikane dhe në zbutjen e kufizimeve kineze për eksportet e metaleve të rralla.
Tregjet po presin gjithashtu vendimin e Rezervës Federale (Fed) për normat e interesit, që pritet të shpallet këtë javë. Ari zakonisht fiton terren kur normat e interesit janë të ulëta, pasi mbajtja e tij nuk gjeneron fitim nga interesi.
Ekspertët e “Capital Economics” kanë ulur parashikimin e tyre për çmimin e arit në fund të vitit 2026, duke e vlerësuar në 3,500 dollarë për ons. Sipas tyre, rritja e shpejtë me 25 % që nga gushti është e vështirë të justifikohet, duke marrë parasysh valët e mëparshme të rritjeve. /Skyweb.al
