Drejtoria e Përgjithshme e Shërbimeve të Transportit Rrugor ka prezantuar një sërë shërbimesh të reja digjitale, që synojnë të lehtësojnë procedurat për drejtuesit e automjeteve, të reduktojnë burokracitë dhe të kufizojnë paraqitjet fizike në sportele.
Drejtori i DPSHTRR-së, Kreshnik Bajraktari, bëri të ditur se një prej risive është njoftimi automatik me SMS për qytetarët që aplikojnë për leje drejtimi. Përmes këtij shërbimi, aplikantët informohen sapo dokumenti të jetë gati për t’u tërhequr.
Sipas tij, në Tiranë leja e drejtimit gjenerohet brenda 30 minutave, ndërsa në qytetet e tjera brenda një dite.
Një tjetër zhvillim është aplikacioni i ri “Mjeti im”, përmes të cilit qytetarët do të kenë mundësi të aksesojnë nga telefoni informacionin dhe shërbimet që lidhen me automjetet e tyre.
Ndryshime parashikohen edhe për autoshkollat. Moduli “Autoshkolla Online” synon të digjitalizojë administrimin e tyre, të thjeshtojë procedurat për kandidatët që kërkojnë të pajisen me patentë dhe të mundësojë monitorim më të mirë të aktivitetit të autoshkollave nga DPSHTRR.
Po ashtu, institucioni ka prezantuar digjitalizimin e procesit për Certifikatën e Aftësisë Psiko-Fizike dhe Raportin e Aftësisë për Punë. Sistemi i ri synon të mundësojë dorëzimin dhe verifikimin elektronik të dokumenteve, si dhe shkëmbimin e të dhënave ndërmjet institucioneve, duke reduktuar përdorimin e dokumentacionit fizik.
Në drejtim të shërbimeve ekzistuese, Bajraktari njoftoi se asistenti virtual ka regjistruar rreth 60 mijë përdorues, ndërsa sistemi për llogaritjen e tarifave të targave është përdorur nga mbi 19 mijë vizitorë për targat e personalizuara dhe mbi 1 300 për targat jashtë radhe.
Ndërkohë, platforma QSMART ka regjistruar 3 410 rezervime online, duke u mundësuar qytetarëve të rezervojnë elektronikisht shërbimet në sportele.
Për lehtësimin e pagesave, DPSHTRR ka mundësuar përdorimin e terminaleve POS, përmes të cilave qytetarët dhe bizneset mund të paguajnë me kartë bankare.
Bajraktari prezantoi edhe të dhënat e kontrolleve të Task Forcës, ku rezultojnë 2 561 gjoba të regjistruara në sistem, nga të cilat 1 334 janë arkëtuar.
Për dokumentimin e kontrolleve fizike të automjeteve është prezantuar gjithashtu teknologjia MDM, e cila mundëson gjeolokalizimin e fotografive dhe gjurmueshmërinë e kontrolleve.
Në kuadër të vlerësimit të cilësisë së shërbimit, qytetarët mund të japin mendimin e tyre përmes kodeve QR. Deri tani janë regjistruar 1 159 vlerësime, ndërsa numri i gjelbër dhe sistemi telefonik PBX kanë administruar 1 373 telefonata.
Sipas DPSHTRR-së, këto ndryshime janë pjesë e procesit të transformimit digjital, me objektiv shkurtimin e kohës së shërbimit dhe uljen e kostove administrative për qytetarët dhe bizneset.
















