Sipas një vlerësimi të bërë nga gazetarë të faqes së njohur turistike “Chase Travel”, janë zbuluar disa prej destinacioneve më emocionuese që pritet të bëjnë bujë vitin e ardhshëm. Ndër to, Riviera Shqiptare po del në krye si bregdeti më i kërkuar i Evropës, falë çmimeve të përballueshme, mungesës së mbipopullimit dhe aksesit më të lehtë se kurrë më parë, shkruan Betsy Blumenthal për këtë faqe.
Ky është një lajm i mirë për udhëtarët që kërkojnë diell, plazhe të qeta dhe destinacione ende të arritshme financiarisht në Evropë. Vetëm 70 kilometra në lindje të Salentos në Itali, përtej ngushticës së Otrantos, ndodhet Shqipëria – një bukuri ballkanike që më në fund po merr vëmendjen ndërkombëtare që meriton.
Me sitet arkeologjike të ruajtura mirë, liqene e laguna me ujë kristal, verë të fortë, ushqim të shijshëm dhe një bregdet mahnitës, Shqipëria po bëhet një destinacion gjithnjë e më i preferuar. Përgjatë Rivierës Shqiptare, qytete si Ksamil ekuilibrojnë të kaluarën – me rrënojat greko-romake të Butrintit dhe kalanë e Ali Pashës – me të tashmen, përmes plazheve të bukura, bareve moderne dhe restoranteve të shumta.
Jashtë qyteteve të njohura si Saranda, kanë filluar të shfaqen resorte të reja si “Pegasus”, ku pushuesit mund të shijojnë diellin dhe koktejet buzë detit. Në Himarë e Dhërmi janë hapur hotele tërheqëse si “Prado Luxury Hotel” dhe “La Brisa Boutique Hotel”, ndërsa në Palasë ka nisur veprimtarinë “Green Coast Hotel Gallery Collection”. Projekte të tjera si “Panorama Hilltop Retreat” dhe “Red Sol Resort” janë ende në ndërtim.
Një valë e re investimesh në infrastrukturë po e lidh gjithë zonën. Rruga e re Palasë-Dhërmi, me asfalt të sapohapur, çon drejt tunelit të Llogarasë, që do të shkurtojë ndjeshëm trafikun drejt Vlorës – qendra kryesore e Rivierës Shqiptare. Po aty, një aeroport ndërkombëtar i ri pritet të hapet përpara verës së vitit 2026, duke e bërë këtë cep mahnitës të Mesdheut më të arritshëm se kurrë më parë. /Skyweb.al
