Kryeministri Edi Rama dhe ministrja e Ekonomisë dhe Inovacionit, Delina Ibrahimaj, zhvilluan këtë të enjte një takim me pensionistët, ndërsa qeveria ka nisur shpërndarjen e bonusit veror prej 5 mijë lekësh.
Gjatë fjalës së saj, Ibrahimaj tha se pas reformës së pagave, fokusi kryesor i qeverisë është zhvendosur te pensionistët.
Sipas saj, që nga marrja e mandatit, rreth 70 miliardë lekë janë alokuar për bonuset e pensionistëve.
“Pensionet ishin diçka ku ne, që kur morëm mandatin, do të fokusoheshim. Që kur kemi marrë mandatin, janë rreth 70 miliardë lekë që kanë shkuar për bonuset e pensionistëve”, u shpreh Ibrahimaj.
Ministrja tha se më parë qeveria nuk ka pasur mundësi të bëjë rritje domethënëse të pensioneve, ndaj është aplikuar indeksimi vjetor për të mbrojtur fuqinë blerëse nga rritja e çmimeve, si dhe bonusi tradicional i dhjetorit.
“Ne nuk kishim mundësi më parë që të bënim rritje domethënëse të pensioneve, por çdo vit bëjmë indeksimin e pensioneve, me qëllim që të ardhurat dhe fuqia blerëse e pensionistëve të mos ndikohet nga rritja e çmimeve. Kemi pasur çdo vit bonusin e pensioneve, që është dhënë në dhjetor”, tha ajo.
Ibrahimaj njoftoi se nga viti 2026 politika për pensionistët do të ndryshojë, duke kaluar drejt shpërndarjes së bonusit në bazë mujore, sipas kategorive.
Sipas ministres, synimi është që pensioni mesatar për ata që kanë vite të plota pune të shkojë në 400 euro, ndërsa për ata me vite të pjesshme pune të shkojë në 200 euro.
“Bonusin do ta japim në bazë mujore, sipas kategorive, në mënyrë që pensioni mesatar i atyre që kanë vite të plota pune të shkojë në 400 euro dhe pensioni mesatar i atyre që kanë vite të pjesshme pune të shkojë në 200 euro”, deklaroi Ibrahimaj.
Ajo shtoi se të ardhurat shtesë që do të vijnë nga rritja ekonomike do të rishpërndahen te pensionistët.
Nga sot ka nisur edhe shpërndarja e bonusit të ri për vitin 2026, në vlerën 5 mijë lekë.
Sipas Ibrahimajt, rreth 33 mijë pensionistë e kanë marrë bonusin që në ditën e parë, bashkë me pensionin.
“Janë rreth 33 mijë pensionistë që sot, bashkë me pensionin, kanë marrë bonusin e vlerës dhe rishpërndarjen e të ardhurave. Për këtë bonus, qeveria ka vënë në dispozicion 3.9 miliardë lekë”, u shpreh ministrja.
