Shqipëria dhe Vietnami kanë hedhur një hap të ri për rekrutimin e punonjësve vietnamezë, në një kohë kur bizneset shqiptare po përballen me mungesë të fuqisë punëtore në disa sektorë.
Ministrja e Ekonomisë dhe Inovacionit, Delina Ibrahimaj, dhe zëvendësministri i Brendshëm i Vietnamit, Vũ Chiến Thắng, nënshkruan në Vietnam Memorandumin e Mirëkuptimit për bashkëpunimin në fushën e punësimit.
Marrëveshja synon krijimin e një kuadri institucional për përzgjedhjen, përgatitjen, rekrutimin dhe punësimin e qytetarëve vietnamezë në Shqipëri.
Procesi pritet të bazohet te nevojat konkrete të tregut shqiptar të punës dhe të zbatohet në përputhje me legjislacionin e të dy vendeve.
Sipas njoftimit, marrëveshja parashikon gjithashtu respektimin e standardeve ndërkombëtare për mbrojtjen e të drejtave të punonjësve.
Ministrja Ibrahimaj tha se rritja e turizmit, investimeve private dhe aktivitetit në sektorët strategjikë ka shtuar kërkesën për fuqi punëtore në Shqipëri.
Ajo e cilësoi marrëveshjen si një mekanizëm për krijimin e kanaleve të rregullta, të sigurta dhe transparente të rekrutimit.
Në zbatim të memorandumit, dy vendet do të hartojnë një plan të përbashkët veprimi.
Plani do të përcaktojë procedurat e rekrutimit, standardet e trajnimit, bashkëpunimin mes institucioneve dhe mënyrën e monitorimit të marrëveshjes.
Gjatë takimeve është diskutuar edhe organizimi i një Forumi Ekonomik dhe të Punësimit Shqipëri–Vietnam.
Forumi pritet të krijojë kontakte të drejtpërdrejta ndërmjet punëdhënësve shqiptarë dhe partnerëve vietnamezë që merren me rekrutimin dhe përgatitjen e punonjësve.
Marrëveshja synon të ndihmojë bizneset shqiptare në plotësimin e vendeve të lira të punës, ndërsa për autoritetet mbetet sfidë garantimi i kontratave, pagave, kushteve të punës dhe mbrojtjes së punonjësve të huaj.
