Shërbimi Informativ i Shtetit do të ketë kompetenca më të gjera dhe akses më të madh në bazat shtetërore të të dhënave. Ndryshimet parashikohen në ligjin nr. 64/2026, të miratuar nga Kuvendi më 2 korrik sapo janë botuar në Fletoren Zyrtare dhe pritet të hyjnë në fuqi së shpejti.
Ligji zgjeron ndjeshëm fushën ku SHISH mund të mbledhë informacion brenda dhe jashtë vendit. Përveç kërcënimeve tradicionale ndaj sigurisë kombëtare, në fokus futen tashmë kërcënimet kibernetike, hibride dhe ekonomike.
SHISH do të mbledhë informacion edhe për rreziqet që prekin infrastrukturën kritike dhe të rëndësishme të vendit. Kompetencat përfshijnë gjithashtu veprimtarinë e shërbimeve të huaja të inteligjencës dhe kërcënimet që lidhen me pavarësinë, integritetin dhe rendin kushtetues.
Në ligj përfshihen në mënyrë të posaçme terrorizmi, ekstremizmi, prodhimi dhe përhapja e armëve të dëmtimit në masë.
Pjesë e fushës së veprimit bëhen edhe krimet kundër mjedisit dhe zhvillimet që mund të cenojnë stabilitetin e brendshëm ose rajonal.
Ndryshimi tjetër i rëndësishëm lidhet me aksesin në informacion. SHISH fiton të drejtën për të hyrë në bazat shtetërore të të dhënave, për aq sa kjo lidhet me funksionet e tij ligjore.
Mënyra e aksesit do të përcaktohet përmes marrëveshjeve ndërinstitucionale.
Kjo do të thotë se shërbimi informativ do të mund të përdorë drejtpërdrejt të dhëna që administrohen nga institucione të tjera shtetërore.
Ligji nuk përcakton në mënyrë të hollësishme në tekstin bazë se cilat databaza do të aksesohen, duke ua lënë rregullimin marrëveshjeve të mëvonshme.
Këshilli i Ministrave dhe drejtori i SHISH-it duhet të miratojnë aktet nënligjore brenda tre muajve nga hyrja në fuqi.
Me ndryshimet e reja, shërbimi sekret shqiptar merr një rol më të gjerë në mbikëqyrjen e kërcënimeve që lidhen me ekonominë, teknologjinë dhe sigurinë e infrastrukturave. /skyweb.al
