Presidenti Bajram Begaj mori pjesë në aktivitetin e organizuar në Tiranë me rastin e 20-vjetorit të themelimit të Eurorajonit Adriatiko-Jonian, me temë “Vizioni për të ardhmen e Eurorajonit Adriatiko-Jonian”.
Në fjalën e tij, Begaj vlerësoi Eurorajonin si një model të suksesshëm të bashkëpunimit ndërkufitar dhe një shembull të solidaritetit evropian, që prej dy dekadash ka afruar komunitetet dhe ka forcuar partneritetet mes rajoneve.
Presidenti theksoi se, përballë sfidave të reja gjeopolitike, ekonomike, teknologjike dhe mjedisore, bashkëpunimi rajonal nuk mund të shihet më si çështje dytësore, por si element i rëndësishëm për stabilitetin dhe zhvillimin evropian.
Sipas tij, rajonet që bashkëpunojnë kanë më shumë mundësi të tërheqin investime, të mbrojnë mjedisin, të zhvillojnë infrastrukturën dhe të krijojnë mundësi të reja për qytetarët.
Begaj vlerësoi gjithashtu rolin e Eurorajonit në ndërtimin e urave të bashkëpunimit mes autoriteteve vendore e rajonale, universiteteve, institucioneve publike, shoqërisë civile dhe sipërmarrjeve.
Duke u ndalur te procesi i integrimit evropian të Shqipërisë, Kreu i Shtetit tha se nisma të tilla e ndihmojnë vendin të afrohet me standardet evropiane dhe të forcojë kulturën e bashkëpunimit, koordinimit dhe solidaritetit.
Presidenti rikonfirmoi angazhimin e Shqipërisë për të mbështetur çdo iniciativë që forcon lidhjet mes komuniteteve të rajonit dhe kontribuon në një hapësirë Adriatiko-Joniane më të zhvilluar, të qëndrueshme dhe konkurruese.
Në fund, Begaj uroi kryetarin e Qarkut Tiranë, Aldrin Dalipi, për marrjen e kryesimit të Eurorajonit Adriatiko-Jonian për një periudhë 5-vjeçare.
