Kryeministri Edi Rama, gjatë një bashkëbisedimi me pensionistët, tha se bonusi i verës për këtë kategori është mundësuar nga rritja e të ardhurave në buxhet, mes tyre edhe nga rritja e çmimit të naftës.
Rama deklaroi se qeveria do të jetë pranë pensionistëve sa herë ekonomia krijon hapësirë për mbështetje shtesë.
“Qeveria vendosi të japë një tjetër bonus për pensionistët. Vitin e shkuar u tha që po japim bonus për fushatë, nuk kemi fushatë këtë vit. Bonusi ka lidhje me vëmendjen që ju kemi premtuar se do kemi vijimisht”, u shpreh Rama.
Sipas kryeministrit, bonusi i ri lidhet me tejkalimin e të ardhurave të parashikuara.
“Ka një komponent që nuk e kishim parashikuar, rritja e të ardhurave nga rritja e çmimit të naftës. Rritjen do ta keni ju. Edhe ata që u ankuan për rritjen e çmimit, kanë kontribuar për rritjen tuaj”, tha ai.
Rama shtoi se rritja e të ardhurave nuk do të shkojë vetëm për pensionistët, por edhe për kategori të tjera në nevojë.
“Nuk janë vetëm pensionistët, por edhe personat me aftësi të kufizuar. Dyfishuam ndihmën për personat me aftësi të kufizuar. Janë fëmijët me aftësi të veçanta, u mor vendimi, fillon zbatimi për të dyfishuar ndihmën”, deklaroi kryeministri.
Ai tha gjithashtu se qeveria ka parashikuar mbështetje edhe për kujdestarët e personave me aftësi të kufizuara.
“Kemi pasur problemin e barrës së kujdestarëve për personat me aftësi të kufizuar. Këto do t’i paguajë shteti”, u shpreh Rama.
Bonusi i verës për pensionistët është një pagesë shtesë prej 5 mijë lekësh, që ka nisur të shpërndahet gjatë muajit korrik.
