Të dhënat më të fundit të INSTAT për Prodhimin e Brendshëm Bruto (PBB) sipas rajoneve tregojnë ndarje të qartë ekonomike mes qarqeve të vendit.
Në vitin 2023, Tirana vijon të jetë motori kryesor i ekonomisë shqiptare, duke gjeneruar gati gjysmën e PBB-së kombëtare dhe duke pasur gjithashtu nivelin më të lartë të PBB-së për frymë, me 1 367 000 lekë për banor, rreth 39% mbi mesataren kombëtare.
Pas Tiranës renditen Durrësi dhe Fieri, me respektivisht 1 086 000 dhe 1. 042 000 lekë për frymë, të vetmit qarqe që qëndrojnë mbi mesataren kombëtare prej 984 mijë lekësh.
Në anën tjetër të tabelës, Kukësi, Dibra dhe Berati mbeten rajonet më të varfra të Shqipërisë.
PBB për frymë në Kukës arrin vetëm 549 mijë lekë, duke qenë 44% nën mesataren kombëtare, ndërsa Dibra dhe Berati ndodhen pak mbi këtë nivel, me rreth 595–599 mijë lekë për frymë.
Në total, ekonomia shqiptare u rrit me 4% gjatë vitit 2023, por pothuajse gjysma e kësaj rritjeje u gjenerua nga vetëm tre qarqe: Tirana, Fieri dhe Durrësi, ndërsa veriu dhe jugu mbeten me ndikim të kufizuar në PBB.
Diferencat e theksuara mes qarqeve tregojnë se zhvillimi ekonomik i vendit është përqendruar në qendër dhe bregdet, ndërsa zonat verilindore e juglindore vijojnë të përballen me nivele të ulëta prodhimi dhe të ardhurash. /skyweb.al
