Presidenti francez Emmanuel Macron njoftoi sot krijimin e një shërbimi të ri ushtarak vullnetar për të rinjtë, i cili do të nisë nga mesi i vitit 2026 dhe synon t’i mundësojë Francës një përgjigje më të fortë ndaj “kërcënimeve në rritje” në skenën globale, raporton “Reuters”.
Ky hap vjen në kuadër të ndryshimeve më të gjera që po ndodhin në Evropë, ku vendet që prej dekadash kanë qenë të mbështetura në garancitë e sigurisë së SHBA-së, po shprehin shqetësime për ndryshimin e prioriteteve të presidentit amerikan Donald Trump dhe për qëndrimin agresiv të Rusisë.
“Franca nuk mund të qëndrojë duarkryq”, deklaroi Macron gjatë një fjalimi të mbajtur në Brigadën e 27-të të Këmbësorisë Malore në Varces, në Alpet Franceze.
Ai shtoi se plani është frymëzuar nga praktikat e partnerëve evropianë, në një moment kur të gjithë aleatët e kontinentit po marrin masa në përgjigje të një kërcënimi të përbashkët.
Programi vullnetar do të jetë i hapur për të rinjtë 18 dhe 19 vjeç, do të zgjasë 10 muaj, pjesëmarrësit do të paguhen dhe do të ketë një kosto prej 2 miliardë eurosh. Shërbimi planifikohet të nisë me 3 000 të rinj në vitin 2026, që do të shërbejnë vetëm në territorin francez, ndërsa numri pritet të arrijë në 10 000 pjesëmarrës deri në vitin 2030.
Macron shprehu ambicien që deri në vitin 2035 të regjistrohen 50 000 të rinj, në varësi të zhvillimit të kërcënimeve globale.
Pas përfundimit të programit, të rinjtë do të kenë mundësinë të vazhdojnë në jetën civile, të bashkohen me rezervën ushtarake ose të mbeten pjesë e forcave të armatosura.
Ky njoftim vjen ndërkohë që rreth 12 vende të tjera evropiane, përfshirë Gjermaninë dhe Danimarkën, kanë nisur iniciativa të ngjashme.
