Pagesa e qirasë mund të shërbejë edhe për blerjen e banesës, ndërsa familjet që përballojnë këstet, por nuk kanë garanci apo kursime për pagesën fillestare, mund të mbështeten nga shteti. Këto janë dy nga instrumentet që qeveria propozon përmes ndryshimeve në ligjin për strehimin, me synimin për të zgjeruar aksesin në banesa të përballueshme.
Programi “Qira me të drejtë blerjeje” parashikon përdorimin e një banese kundrejt pagesave periodike. Një pjesë e këtyre pagesave mund të zbritet më pas nga çmimi i blerjes.
Kalimi i banesave sociale nga qiraja në këtë program do të lejohet vetëm nëse nuk cenon nevojat për strehim social me qira, shkruan Monitor.al. Projektligji parashikon edhe kredi me interes 0%, të mbështetura nga fondi përkatës dhe buxheti i shtetit.
Për familjet që kanë aftësi ta shlyejnë kredinë, por nuk disponojnë kolateralin ose kontributin fillestar të kërkuar nga banka, propozohet një garanci shtetërore që mbulon një pjesë të principalit.
Përfitues të mundshëm janë familjet me të ardhura të ulëta dhe të mesme që nuk përballojnë tregun, të rinjtë në fillim të karrierës dhe familjet e reja, ku anëtari më i madh është deri në 40 vjeç.
Përfshihen edhe prindërit e vetëm me fëmijë të mitur, punonjësit e shërbimeve publike e profesioneve prioritare, personat me aftësi të kufizuara, kujdestarët e tyre dhe emigrantët e rikthyer që plotësojnë kushtet.
Një tjetër mundësi është kontraktimi i banesave private të pabanuara për strehim social, përmes marrëveshjeve me pronarët që mund të përfshijnë garanci për qiranë dhe mbulim të pjesshëm të mirëmbajtjes.
Ndërkohë, ruhet skema ekzistuese e subvencionimit të qirasë, që mund të mbulojë deri në 100% të qirasë mesatare të miratuar nga bashkia. Diferenca që paguan familja nuk duhet të kalojë 25% të të ardhurave të saj.
Propozimet vijnë në kushtet e qirave të larta: sipas të dhënave të publikuara nga Monitor për janar–qershor 2026, mesatarja në Tiranë arrin 721 euro në muaj, ndërsa për apartamentet 1+1 është 590 euro dhe për 2+1 rreth 954 euro.
Masat janë ende në fazën e projektligjit. Kufijtë e të ardhurave dhe procedurat e përfitimit do të përcaktohen me akte nënligjore. /skyweb.al
