Pasi tjetërsoi pronat më të lakmuara të vendit përmes kontratave me 1 euro, qeveria ka vendosur të heqë dorë nga mekanizmi kontrovers. Drejtori i Agjencisë së Koncesioneve Emiliano Gjika, deklaroi në Komisionin Parlamentar të Ekonomisë se ligji i ri për koncesionet shfuqizon nenin e famshëm, i cili privatizon pronat dhe asetet publike përmes kontratave të qirasë me 1 euro.
“Në projektligjin e ri kemi hequr nga lista e koncesioneve pikën që ka qenë për kontratat simbolike me 1 euro,” tha Gjika.
Ligji i ri “Për koncesionet dhe partneritetin publik-privat”, detyron institucionet të bëjnë publike çmimin e ofertës, listën e çmimeve, katalogun, informacionin lidhur me kriteret e përzgjedhjes së ofertës.
Gjithashtu për çdo koncesion duhet të jetë bërë paraprakisht studimi i fizibilitetit i miratuar edhe nga Ministria e Financave, pasi të jenë analizuar të gjitha kostot-përfitimet dhe mundësitë me rrezik për buxhetin e shtetit.
Përfaqësues të Ministrisë së Financave deklaruan se projektligji vendos rregulla të qarta për planifikimin, dhënien, administrimin dhe mbikëqyrjen e kontratave të koncesionit, duke u mbështetur në parimet e transparencës, mosdiskriminimit, proporcionalitetit dhe sigurisë juridike.
“Projektligji synon unifikimin e procedurave konkurruese; forcimin e kontrollit ex-ante dhe ex-post nga Ministria e Financave; garantimin e rregullave transparente për zbatimin dhe monitorimin e kontratave; menaxhimin e risqeve dhe ndarjen e tyre ndërmjet palëve; harmonizimin me standardet e BE-së; rritjen e rolit mbikëqyrës të Ministrisë së Financave, APP dhe ATRAKO si dhe promovimin e vlerës më të mirë për paranë dhe mbrojtjen e interesit publik”, tha zëvendësministrja e Ekonomisë dhe Inovacionit, Blerta Rama.
Sipas saj, projektligji mbështet prioritetet e qeverisë për rritje ekonomike duke mobilizuar kapital privat në fusha si infrastruktura, energjia, mjedisi, turizmi, shëndetësia dhe arsimi.
Kontrata e qirasë 1 euro janë përdorur për të rrëmbyer pronat më të lakmuara të bregdetit, por edhe në privatizimin e aseteve të tjera publike. /Kapitali.al
