Drejtoria e Përgjithshme e Tatimeve ka nisur rimbursimin e 517,731,642 lekëve për individët që kanë deklaruar një ose dy fëmijë në ngarkim në Deklaratën Individuale Vjetore të të Ardhurave për vitin 2025.
Procesi përfshin 34,263 individë, të cilët pas dorëzimit të DIVA 2025 kanë rezultuar me tatim të mbipaguar.
Sipas Administratës Tatimore, shumat përkatëse do t’u kalojnë qytetarëve në llogaritë bankare të deklaruara prej tyre.
Rimbursimi lidhet me përllogaritjen përfundimtare të tatimit mbi të ardhurat personale, ku individët që kanë deklaruar fëmijë në ngarkim përfitojnë zbritjet përkatëse sipas ligjit.
Në rastet kur nga kjo përllogaritje rezulton se gjatë vitit është paguar më shumë tatim se detyrimi real, diferenca i kthehet qytetarit.
Tatimet njoftuan dy ditë më parë nisjen e procedurës për këtë kategori përfituesish, ndërsa tashmë kanë bërë të ditur edhe vlerën totale të fondit që do të rimbursohet.
Procesi shihet si një lehtësi fiskale për familjet me fëmijë, por edhe si një mënyrë për të nxitur deklarimin korrekt të të ardhurave dhe të personave në ngarkim.
Pagesat do të kryhen vetëm për individët që kanë plotësuar saktë deklaratën, kanë deklaruar llogarinë bankare dhe kanë rezultuar me tatim të mbipaguar në sistemin e DIVA 2025.
