Lufthansa Group ka vendosur mbylljen e menjëhershme të filialit të saj rajonal Lufthansa CityLine, duke i dhënë fund operacioneve të një prej njësive historike të transportit ajror në Europë.
Sipas njoftimeve, të 27 avionët e flotës do të dalin nga shërbimi duke nisur nga 18 prilli 2026.
Vendimi vjen në një moment presioni të lartë financiar për kompaninë, i ndikuar nga rritja e ndjeshme e kostove të karburantit dhe një valë e fortë grevash të njëpasnjëshme.
Vetëm gjatë periudhës së fundit, pilotë dhe staf kabine nga tre sindikata të ndryshme kanë zhvilluar katër ndalesa pune, duke çuar në anulimin e deri në 90% të fluturimeve në ditët më kritike, veçanërisht në Frankfurt dhe Mynih.
Sipas Lufthansa, mbyllja e CityLine nuk është një vendim i papritur, por një përshpejtim i një strategjie të nisur më herët. Flota e kësaj kompanie, e përbërë kryesisht nga avionë regionalë Canadair CRJ, konsiderohej e vjetëruar dhe me kosto të larta operimi. Paralelisht, grupi kishte planifikuar transferimin e operacioneve drejt një strukture më të re, Lufthansa City Airlines, ku kushtet e punës dhe kostot e personelit janë më të ulëta.
Në të njëjtën linjë ristrukturimi, Lufthansa ka konfirmuar edhe tërheqjen nga shërbimi të katër avionëve të fundit Airbus A340-600 si dhe ndalimin e operimit për dy Boeing 747-400 deri në fund të sezonit veror.
Punonjësve të prekur nga mbyllja u është ofruar mundësia për t’u integruar në kompani të tjera brenda grupit Lufthansa, ndërsa negociatat për paketat e largimit janë në fazat fillestare.
Ky zhvillim shënon një tjetër goditje për aviacionin europian, i cili po përballet njëkohësisht me presione financiare, sociale dhe strukturore në një treg gjithnjë e më konkurrues.
