Pronarët e apartamenteve që i japin banesat e tyre me qira do të duhet të njoftojnë administratorin e pallatit dhe t’i vënë në dispozicion të dhënat e personave që do të jetojnë aty. Ky është një nga detyrimet e përcaktuara në rregulloren e re për administrimin e banesave dhe ndërtesave, të miratuar nga qeveria shqiptare.
Rregullorja është miratuar nga Këshilli i Ministrave me vendimin nr. 687, datë 11 shtator 2026, me propozimin e ministrit të Shtetit për Pushtetin Vendor, në zbatim të ligjit nr. 55/2025 për administrimin e bashkëpronësisë në ndërtesa. Por, vendimi është botuar në Fletoren Zyrtare të datës 23 tetor 2026 dhe hyn në fuqi pas botimit, pra nga sot.
Sipas nenit 41 të rregullores, çdo pronar që e lëshon apartamentin me qira duhet të njoftojë me shkrim kryesinë e bashkëpronarëve dhe administratorin ose shoqërinë që administron ndërtesën, raporton skyweb.al.
Njoftimi duhet të përmbajë emrin, mbiemrin, adresën e kontaktit dhe numrin e telefonit të qiramarrësit. Pra, nuk mjafton thjesht njoftimi se apartamenti është dhënë me qira, por duhet të identifikohet edhe personi që do ta përdorë atë.
Një tjetër detyrim është që pronari t’i dorëzojë qiramarrësit një kopje të rregullores së administrimit të ndërtesës, në mënyrë që ai të njihet me rregullat e bashkëjetesës dhe përdorimit të hapësirave të përbashkëta.
Megjithëse apartamenti i jepet në përdorim një personi tjetër, përgjegjësia për respektimin e detyrimeve që burojnë nga bashkëpronësia mbetet te pronari. Ndërkohë, edhe qiramarrësi është i detyruar të zbatojë rregullat e bashkëjetesës të miratuara nga asambleja e bashkëpronarëve.
Rregullorja trajton gjithashtu çështjen e tarifave të administrimit, duke bërë dallim mes apartamenteve që përdoren për banim dhe njësive që shfrytëzohen për veprimtari tregtare.
Në nenin 17 përcaktohet se për njësitë që përdoren për qëllime tregtare, drejtpërdrejt nga pronari ose përmes të tretëve, tarifa e administrimit duhet të jetë më e lartë se ajo që zbatohet për njësitë familjare. Për këtë merren parasysh përdorimi i hapësirave të përbashkëta, ashensorëve, shpenzimet e pastrimit dhe frekuenca e përdorimit të ndërtesës.
Megjithatë, dhënia e një apartamenti me qira për banim nuk nënkupton automatikisht aplikimin e tarifës më të lartë. Rregullorja e lidh këtë tarifë me shfrytëzimin për qëllime tregtare, pa përcaktuar shprehimisht trajtimin e apartamenteve që jepen me qira afatshkurtër përmes platformave si Airbnb apo Booking.
Rregullorja e miratuar nga qeveria synon të vendosë një sistem më të qartë përgjegjësish për administrimin e pallateve, mirëmbajtjen e ambienteve të përbashkëta dhe marrëdhëniet mes pronarëve, qiramarrësve dhe administratorëve të ndërtesave. /skyweb.al
