Çmimi i naftës në tregjet ndërkombëtare shënoi rritje këtë të premte, mes shqetësimeve për një përshkallëzim të mundshëm të konfliktit dhe rifillimin e sulmeve ushtarake amerikane ndaj Iranit.
Nafta e papërpunuar “Brent”, referenca kryesore e tregut ndërkombëtar, tregtohej në orët e para të ditës me 116,43 dollarë për fuçi, ose 159 litra, duke u rritur me 1,35% krahasuar me mbylljen e sesionit të mëparshëm.
Shqetësimet për një ndërhyrje të re ushtarake amerikane u shtuan pas raportimeve se presidenti Donald Trump ka diskutuar me drejtues të lartë ushtarakë alternativat për hapat e mëtejshëm në konfliktin me Iranin.
Gazeta amerikane “The Wall Street Journal”, duke iu referuar zyrtarëve amerikanë, raportoi se admirali Brad Cooper, kreu i Komandës Qendrore të SHBA-së (CENTCOM), i ka paraqitur Trumpit disa alternativa ushtarake gjatë një takimi në Shtëpinë e Bardhë. Sipas gazetës, ky zhvillim mund të sinjalizojë përgatitjet për një operacion të ri të rëndësishëm ushtarak.
Ndërkohë, media “Axios” raportoi se informimi i presidentit amerikan ishte përqendruar te bllokada detare e SHBA-së ndaj porteve dhe zonave bregdetare iraniane.
Spekulimet për sulme të reja amerikane dhe izraelite ndaj Iranit janë intensifikuar në një klimë të tensionuar politike, ndërsa zhvillimet e ardhshme mund të ndikojnë drejtpërdrejt në tregjet globale të energjisë.
Megjithatë, paralelisht me përgatitjet e mundshme ushtarake, administrata Trump dhe ndërmjetësuesit rajonalë po përpiqen të gjejnë një zgjidhje diplomatike për konfliktin. Sipas raportimeve të mediave amerikane, zëvendëspresidenti JD Vance po luan një rol drejtues në këto përpjekje për arritjen e një marrëveshjeje të negociuar.
