Sipas të dhënave të projektbuxhetit për vitin 2027, të ardhurat e parashikuara nga licencimi i operatorëve të basteve sportive arrijnë në 2 miliardë lekë, e njëjta shumë e planifikuar edhe për vitin 2026, e cila nuk u realizua për shkak të moslicencimit të kompanive.
Edhe për vitin e ardhshëm, realizimi i këtyre të ardhurave mbetet i kushtëzuar nga nisja e procesit të licencimit, ndërsa vonesat mund të bëjnë që paratë e planifikuara të mos hyjnë sërish në buxhetin e shtetit.
Por ndërsa qeveria bën llogaritë për 20 milionë euro të ardhura vjetore, në terren vijon të funksionojë një treg i tërë bastesh të paligjshme, për të cilin burimet flasin për qarkullimin e miliona eurove në ditë.
Skyweb.al ka raportuar më herët gjerësisht mbi mënyrën se si funksionon ky treg ilegal, lidhjet e dyshuara me struktura që duhet ta luftojnë dhe përplasjet e fundit për kontrollin e tij.
Sipas burimeve të Skyweb.al, mungesa e një marrëveshjeje për ndarjen e “tortës” së ilegalitetit, ku përfshihen bastet sportive, call center-at mashtrues dhe aktivitete të ngjashme, ka shkaktuar kaos në një treg që deri më tani funksiononte si “orë zvicerjane”, falë koordinimit mes aktorëve që e kontrollonin.
Situata mësohet se është ndërlikuar pas ndërhyrjes së një personazhi të fuqizuar së fundmi politikisht, i cili, sipas burimeve, ka kërkuar pjesën e tij në këtë treg fitimprurës.
Kjo ka tronditur marrëdhëniet ekzistuese dhe rolin e personazhit që deri më tani konsiderohej si “koordinatori” i aktiviteteve të paligjshme, duke sjellë fillimisht një ngrirje të basteve dhe call center-ave.
Por kjo situatë nuk zgjati shumë. Një pjesë e organizatorëve nisën të rihapin aktivitetin, duke marrë vetë përsipër rrezikun e goditjes nga policia dhe duke kërkuar mbrojtje individuale për zonat ku operojnë.
Burimet për Skyweb.al kanë treguar se disa lokale bastesh, të kamufluara si kafene apo bilardo, kanë nisur madje të vendosin tabela identifikuese, të cilat shërbejnë për të treguar se kush e kontrollon territorin.
Në këtë mënyrë, tregu që më parë funksiononte nën një koordinim të përgjithshëm ka kaluar në një fazë ku secili vepron për “kokën” e tij, duke kërkuar të sigurojë vazhdimësinë e aktivitetit dhe kontrollin mbi zonat përkatëse.
Ndërkohë, shteti vijon të presë licencimin e operatorëve të ligjshëm, nga të cilët ka planifikuar të mbledhë 2 miliardë lekë në vitin 2027.
Kontrasti mes të ardhurave që qeveria pret nga licencat dhe përmasave të tregut të paligjshëm ngre një pyetje thelbësore: kush po përfiton realisht nga zvarritja e formalizimit të basteve sportive?
Për sa kohë aktiviteti i ligjshëm mbetet i bllokuar, ndërsa rrjeti ilegal vijon të operojë dhe të qarkullojë shuma të konsiderueshme parash, përfituesit kryesorë mbeten ata që kontrollojnë këtë treg në terren.
Dhe ndërsa në buxhet regjistrohen vetëm parashikime për miliona euro të ardhura, beteja për ndarjen e “tortës” së basteve të paligjshme duket se vazhdon larg syve të publikut. /skyweb.al
