Pas tronditjes së bursave kineze, frika nga një flluskë e mundshme në sektorin e inteligjencës artificiale ka mbërritur edhe në Wall Street, ku gjigantët amerikanë të teknologjisë po përballen me një valë shitjesh të aksioneve dhe dyshime në rritje mbi kthimin e investimeve miliardëshe në AI.
Goditjen më të fortë e ka marrë Alphabet, kompania mëmë e Google, aksionet e së cilës ranë me 12.6% gjatë seancës së 29 tetorit, duke fshirë rreth 500 miliardë dollarë nga kapitalizimi i saj në treg.
Bëhet fjalë për një nga humbjet më të mëdha të vlerës së tregut të regjistruara ndonjëherë nga një kompani në Wall Street, ndërsa rënia tërhoqi poshtë edhe indeksin Nasdaq, i cili e mbylli seancën me humbje prej rreth 1.4%.
Shkak për reagimin e investitorëve u bënë rezultatet financiare të Alphabet, të cilat treguan se kostot e investimeve në inteligjencën artificiale po rriten me ritme shumë të shpejta, ndërsa kthimi financiar mbetet nën presion.
Kompania raportoi të ardhura prej 127.6 miliardë dollarësh për tremujorin e tretë, poshtë pritshmërive të analistëve, ndërsa fluksi i lirë i parasë rezultoi negativ me 9.07 miliardë dollarë.
Situata ka shtuar shqetësimet se kompanitë teknologjike po shpenzojnë shuma jashtëzakonisht të mëdha për qendra të dhënash, çipa dhe infrastrukturë të inteligjencës artificiale, pa arritur ende të sigurojnë fitime që justifikojnë plotësisht këto investime.
Presioni është shtrirë edhe te kompani të tjera. Aksionet e Amazon ranë rreth 7% pas mbylljes së tregut, ndërsa Intel pësoi një rënie prej rreth 23% në tregtimin pas orarit zyrtar.
Frika është përhapur edhe në bursat aziatike, ku kompanitë e gjysmëpërçuesve dhe teknologjisë janë goditur nga shitjet, ndërsa investitorët po zhvendosin një pjesë të kapitalit drejt obligacioneve shtetërore dhe aktiveve më të sigurta.
Zhvillimet vijnë vetëm pak ditë pasi tregu kinez i inteligjencës artificiale pësoi një goditje të rëndë, duke nxitur shqetësime se vlerësimet e larta të kompanive teknologjike mund të mos mbështeten nga rezultatet e tyre financiare.
Për rreziqet e këtij bumi investimesh ka paralajmëruar së fundmi edhe Elon Musk, i cili ka folur për mundësinë e falimentimeve dhe konsolidimit të kompanive që ofrojnë infrastrukturë cloud për AI, për shkak të vështirësive në sigurimin e financimeve.
Sipas analistëve të tregjeve, shqetësimi kryesor nuk është më vetëm aftësia e kompanive për të financuar zhvillimin e inteligjencës artificiale, por nëse investitorët do të arrijnë të marrin përfitime të mjaftueshme nga kapitali i investuar.
Kjo situatë po rikthen krahasimet me flluskën e kompanive të internetit në fund të viteve 1990, kur pritshmëritë e mëdha për teknologjinë çuan në rritje të jashtëzakonshme të vlerës së aksioneve, përpara se tregu të pësonte një korrigjim të fortë.
Ndryshe nga periudha e bumit fillestar të AI, kur çdo njoftim për investime të reja nxiste rritjen e bursave, investitorët tani po kërkojnë rezultate konkrete financiare dhe prova se shpenzimet miliardëshe do të përkthehen në fitime.
Goditja e Google dhe rënia e tregjeve kineze kanë shtuar kështu frikën se entuziazmi që ka mbajtur lart bursat teknologjike gjatë viteve të fundit mund të jetë duke hyrë në një fazë të re korrigjimi.
